नेपाली कांग्रेसका नेता बालकृष्ण खाडले स्थानीयले अपनत्व नलिएको विकासले गति नलिने बताएका छन् । मोतीपुर औद्योगिक क्षेत्रमा हिजो भएको तनावग्रस्त परिस्थितिको विषयमा विज्ञप्ति जारी गर्दै खाणले त्यस्तो बताएका हुन् । 

रुपन्देही जिल्लामा औद्योगिक करिडोर निर्माण गर्ने चाहना रुपन्देहीवासी सबैको भएको भन्दै नेता खाडले जनताले अपनत्व नलिने विकास जनताका लागि नहुने बताए । विकासका काममा जबर्जस्ती गर्न नहुने उनको भनाइ छ । 

बुटवल उपमहानगरपालिकास्थित वडा नं. १७, १८ मोतीपुर, शुद्धोधन गाउँपालिका वडा नं. ३ र सियारी गाउँपालिका वडा नं. ७ मा लामो समयदेखि बसोवास गर्दै आएका किसानहरुलाई लालपुर्जा दिनुपर्ने ठाउँमा जबर्जस्ती त्यहाँका जनताको सहमति विपरीत मोतीपुर औद्योगिक करिडोर शिलान्यास गर्ने कार्यप्रति आफ्नो गम्भीर ध्यानाकर्षण भएको खाणले विज्ञप्तिमा उल्लेख गरेका छन् ।

खाणले मोतीपुर, शुद्धोधन र सियारीका जनताको मागको उचित सम्बोधन नगरी जबर्जस्ती ढङ्गले जनतालाई बल प्रयोग गरी धम्काएर र चित्त दुखाएर गरिएको विकासको औचित्य नहुनेतर्फ सरकार गम्भीर बन्न जरुरी भएको बताए । 

नेता खाडले मोतीपुर, शुद्धोधन र सियारीका जनताको उचित व्यवस्थापन र मागलाई सम्बोधन गरी विकास कार्य अगाडि बढाउन सरकारसँग माग समेत गरेका छन् । यसअघि, सोही घटनाका सम्बन्धमा नेकपाको प्रचण्ड-माधव समूहका नेता घनश्याम भुसालले आफू जनताको पक्षमा रहेको बताइसकेका छन् ।