नेपाली चलचित्र क्षेत्रमा लामो समय एकछत्र राज गरेका राजेश हमालले सबैखाले भूमिका निर्वाह गरेका छन् । देशको सबै भागका समुदायको प्रतिनिधित्व हुने गरी अभिनय गरेपनि आफूलाई मैथिली फिल्ममा अभिनय गर्ने चाहना रहेको हमालले बताएका छन् ।

जनकपुरधाममा आयोजना भएको ‘जनकपुर साहित्य महोत्सव’को अन्तिम दिन अभिनेता हमालले आफ्नो इच्छा सुनाएका हुन् । कार्यक्रममा सहभागी भएका विकाश शाहले मधेश तथा मैथिली समुदायको प्रतिनिधित्व हुने गरी फिल्ममा किन अभिनय गर्नु भएन भनेर हमाललाई प्रश्न गरेको थिए । 

शाहको प्रश्नको उत्तर दिने क्रममा हमालले भने ‘मैले देशको पूर्वदेखि पश्चिम र हिमालदेखि तराई-मधेसमा सम्पूर्ण समुदायको प्रतिनिधित्व हुने अभिनय गरेको हुँ । मैले एउटा भाषामा मात्रै अभिनय गरेको छु । त्यो नेपाली भाषा हो ।’

सोही क्रममा उनले आफू मैथिली भाषाको चलचित्रमा अभिनय गर्न इच्छुक रहेको बताए । उनले भने ‘म मैथिली भाषाको चलचित्रमा अभिनय गर्न इच्छुक छु । मेरो शौख बाँकी नै छ मैथिली फिल्ममा अभिनय गर्ने । मौका पाए अभिनय गर्छु ।’