विश्वमा कोरोनाको दोस्रो लहर सुरु भयो । नेपालमा वायु प्रदूषणका कारण बाहिर निस्कने वातावरण छैन । कोरोनाका कारण सरकारले भिडभाड नगर्नु भनेर आग्रह गरिसकेको थियो । वातावरण प्रदूषणका कारण पनि घर बाहिर ननिस्कनु भनेर आग्रह गर्‍यो । कोरोना पुनः बढेसँगै अन्योलमा परेका सिनेकर्मी वातावरणका कारण झन् अन्योलमा परे । उनीहरुले धमाधम आफ्ना चलचित्र प्रदर्शन मिति सार्न थालेका छन् ।

अभिनेता पुष्प खड्का र अभिनेत्री वर्षा शिवाकोटीले अभिनय गरेको चलचित्र ‘मनसँग मन’को प्रदर्शन मिति ‘पोस्टपोन्ड’ गरिएको छ । यही चैत २७ गतेलाई प्रदर्शन मिति पक्का गरेर प्रचारमा निस्किएको चलचित्र युनिटले मिति सारेको हो ।

सौरभ इन्टरटेन्मेन्ट र बलामी इन्टरटेन्मेन्टको ब्यानरमा निर्माण भएको चलचित्रको पहिलो पोस्टर भने सार्वजनिक गरिएको थियो । यो चलचित्र रिलिज गर्ने नयाँ मितिका बारेमा वितरकसँग छलफल भइरहेको निर्माण पक्षले जनाएको छ ।

प्रदर्शन मिति पोस्टपोन्ड गरेर सार्वजनिक गरिएको पहिलो पोस्टरमा पुष्प र वर्षालाई रोमान्टिक अवतारमा प्रस्तुत गरिएको छ । यो चलचित्रमा वर्षा र पुष्पका साथमा बुद्धि तामाङ, चाँदनी प्रधान, महेन्द्र बागदास लगायतका कलाकारले शीर्ष भूमिकामा रहेर अभिनय गरेका छन् । चलचित्रको एक गीतमा पल शाह र पूजा शर्मालाई पनि देख्न सकिनेछ ।

कैलाश राईले निर्देशन गरेको चलचित्रमा अरुण तामाङले लगानी गरेका हुन् ।