बाँकेको सुशील कोइराला प्रखर क्यान्सर अस्पताल बन्द भएको छ । अस्पतालका कर्मचारीमा कोरोना देखिएपछि अस्पतालमा आकस्मिकबाहेक सबै सेवा बन्द गरिएको छ ।

पिसिआर परीक्षणका क्रममा अस्पतालमा कार्यरत ९० प्रतिशत कर्मचारीमा कोरोना संक्रमण देखिएपछि अस्पतालले सेवा बन्द गरेको हो । पिसिआर परीक्षण गर्दा अस्पतालका डाक्टर, स्टाफ नर्स, प्रशासनिक कर्मचारीमा पोजेटिभ देखिएको छ ।

अस्पतालले सूचना निकालेर आज आइतबारदेखि वैशाख १८ गतेसम्म इमरजेन्सीबाहेकका सबै सेवा बन्द गर्ने जानकारी गराएको छ । जसबाट बिरामीलाई पर्न गएको असुविधाप्रति अस्पतालले क्षमा मागेको छ । 

पछिल्लो समय बाँके कोरोनाको हटस्पट बनेको छ । संक्रमणको दोस्रो लहरबाट सबैभन्दा बढी चपेटामा परेको बाँकेको नेपालगञ्जमा स्थिति अझ जटिल देखिएको छ ।