पछिल्लो २४ घण्टामा कर्णालीमा थप २८ जनामा कोरोना भाइरस (कोभिड—१९) को संक्रमण पुष्टि भएको छ । र्यापिड एन्टिजेन विधिबाट ७७ जनाको कोरोना परीक्षण गरिएकोमा २८ जनामा संक्रमण पुष्टि भएको हो । तीमध्ये दैलेखका ४, कालिकोटका ७ र सल्यानका १७ जना रहेका छन् । 

योसँगै र्यापिड एन्टिजेन विधिबाट गरिएको परीक्षणबाट संक्रमित हुनेको संख्या २ सय ८६ पुगेको छ । उक्त विधिबाट हाल सम्म ५ हजार ७ सय ५० जनाको कोरोना परीक्षण गरिएको छ । 

हालसम्म आरटी पिसिआर विधिबाट गरिएको कोरोना परीक्षणमा संक्रमित हुनेको संख्या ७ हजार ९ सय ९४ पुगेको छ । 

तीमध्ये ७ हजार ५ सय १४ जना उपचारपछि निको भइसकेका छन् भने ४ सयजना संक्रमित प्रदेशका विभिन्न अस्पताल तथा आइसोलेसन सेन्टरमा छन् । 

पछिल्लो २४ घण्टामा ३० जना संक्रमित उपचारपछि निको भएका छन् । कुल कोरोना संक्रमितमध्ये हालसम्म ३४ जनाको मृत्यु भएको छ ।