कोरोना महामारी फैलिएपछि विराटनगर महानगरपालिकाले वैशाख महिनाभर सबै शैक्षिक संस्था बन्द गर्ने निर्णय गरेको छ ।

विराटनगरमा एक सातायता दैनिक रूपमा ५० जनाभन्दा बढीमा कोरोना भाइरसको सङ्क्रमण पुष्टि हुँदै आएको छ । आइतबार प्रदेश १ मा कोरोना पुष्टि भएका १२२ जनामध्ये ८४ जना विराटनगर महानगरपालिकाभित्रका छन् ।

आइतबार बसेको नगर शिक्षा समितिको बैठकले भौतिक रूपमा हुने विद्यालयको सबै गतिविधि बन्द गर्ने निर्णय गरेको हो । विराटनगरमा केही विद्यालयका शिक्षक तथा विद्यार्थीमा समेत कोरोना सङ्क्रमण भएको छ । 

पूर्व निर्धारित परीक्षा तथा पठनपाठन २०७८ वैशाख मसान्तसम्मका लागि स्थगित गरिएको महानगरपालिकाका नगर शिक्षा अधिकारी दुर्गाप्रसाद खतिवडाले जानकारी दिएका छन् । 

सूचना विपरीत विद्यालयहरू सञ्चालन भए कारबाही गर्ने समेत बैठकले निर्णय गरेको जनाइएको छ ।