नेपाल सुपर लिगमा पोखरा थन्डर्सले पहिलो जित दर्ता गरेको छ ।

उसले बुधबार त्रिपुरेश्वस्थित दशरथ रंगशालामा भएको निकै प्रतिस्पर्धात्मक खेलमा विराटनगर सिटी एफसीमाथि १-० को कठिन जित हात पारेको हो । 

खेलको ८३ औँ मिनेटमा नवयुग श्रेष्ठले गरेको एक मात्र गोल पोखरालाई ३ अंक दिलाउन पर्याप्त बन्यो । उनले मोसा अब्बाको फ्रिकिकमा हेडमार्फत उत्कृष्ट गोल गरेका थिए । 

जितसँगै पोखराले २ खेलबाट ३ अंक जोडेको छ । उसले पहिलो खेलमा बुटवल लुम्बिनी एफसीसँग २-० को पराजय बेहोरेको थियो । 

विराटनगरले पनि २ खेलबाट ३ अंक जोडेको छ । उसले पहिलो खेलमा धनगढी एफसीलाई ३-० ले हराएको थियो ।