गण्डकी प्रदेशका मुख्यमन्त्री पृथ्वी सुब्बा गुरुङविरुद्ध आएको अविश्वासको प्रस्तावपछि त्यहाँको राजनीतिमा नयाँनयाँ तरङ्ग देखिइरहेको छ । बुधबार अविश्वासको प्रस्तावमा मतदान हुन तयारी भइरहेका बेला मनाङबाट स्वतन्त्र उम्मेदवारका रुपमा प्रदेशसभा सांसद जितेका दीपक मनाङे एकाएक गायब भए । जनमोर्चाका सांसद खेम विक्रम शाहीलाई एक्कासी कोरोना लाग्यो। उनी आइसियुमा भर्नै भए । 

गायब भएका दीपक मनाङे  नामले चिनिने राजिव गुरुङलाई भोलिपल्टै मन्त्री पद मिल्यो । गुण्डा नाइकेका रुपमा परिचय  बनाएका र आपराधिक पृष्ठभूमि भएका मनाङे मन्त्री भएपछि एकाएक देशभरका सञ्चार माध्यम र सामाजिक सञ्जाल मनाङेमय बन्यो । 

मनाङे प्रदेश सकारको मन्त्री भएपछि सामाजिक सञ्जालमा  थरीथरीका प्रतिक्रिया आए । आइरहेका छन्। धेरैले सत्तारुढ दल एमालेको आलोचना गरे । एमालेकै माधव नेपाल पक्षका नेता कार्यकर्ताहरूले समेत मनाङेलाई मन्त्री बनाउने कामको तीब्र आलोचना गरिरहेका छन्। 

केहीले उनको बचाउमा अभिव्यक्ति दिइरहेका छन् । कानुन बमोजिम चुनाव जितेर आएकाले कानुन अनुसार मन्त्री किन बन्न नपाउने ? भन्ने तर्क एकथरीको छ । अब देशको राजनीतिमा नैतिकता खरानी भएको ठहर धेरैले गरेका छन् । धेरैले व्यंग्य गर्दै मनाङे मन्त्री भएपछि सुखी नेपाली समृद्ध नेपालको नाराले सार्थकता पाएको भनेका छन् । अब देश समाजवाद साम्यवादमा पुग्ने दिन धेरै टाढा नभएको भनेर झटारो हान्ने पनि थुप्रै छन् । 

अहिले नभएर उनलाई सांसद बनाउने बेलामै प्रश्न गर्नुपर्ने तर्क पनि धेरैको छ । अहिले राजनीतिको केन्द्रमा रहेका, सत्तामा रहेका नेताहरु पनि ज्यान मुद्दा खेपिरहेका, ज्यान मुद्दामा जेल बसेकाहरु भएकाले मनाङे मन्त्री बन्नु कुन नौलो कुरा होर भन्दै प्रश्न गर्नेहरु पनि धेरै छन् । 

रमाइला, रमाइला किस्सा बनाएर मनाङेको सत्तारोहणप्रति प्रतिक्रिया जनाउने हरु पनि थुप्रै छन् । 
हेरौं सामाजिक सञ्जालमा मनाङेले मन्त्री बनेपछि आएका केही प्रतिनिधिमूलक प्रतिक्रियाः

मन्त्री बनेपछि ओलीकै शैलीमा मनाङेले प्रतिक्रिया दिएकाले अब ओलीपछि देशलाई योगदान गर्ने पालो मनाङेको भएको भन्दै लेखक खगेन्द्र संग्रौलाले प्रतिक्रिया दिएका छन् । 

ओली महलका आदर्श पात्र दीपक मनाङेले गण्डकी प्रदेशकाे मन्त्री पदकाे पगरी गुथेर ओली सरकै शैलीमा भनेछन्- "म नेताहरूलाई सिकाउन चाहन्छु- मन्त्री भनेकाे पैसा कमाउन हाेइन,देशलाई याेगदान गर्न बन्ने हाे।"
ओली सरपछि मनाङे सरले देशलाई याेगदान गरेर अमरत्वकाे कीर्तिमान कायम गर्ने भए।हे राम!

— Khagendra Sangroula (@belakoboli) April 30, 2021

कार्टुनिस्ट रवि मिश्रले महाभारतको कथा प्रसंग जोड्दै मन्त्रीको रुपमा मनाङेको शपथग्रहणलाई व्यंग्य गरेका छन् । द्रोणाचार्यका चेला अर्जुनको दृष्टिमा ओलीतन्त्रमा दीपक मनाङे बाहेक केही नदेखिएको भन्ने कथा जोडेर मिश्रले व्यंग्य गरेका हुन्।

गुरु द्रोणाचार्यले सोधे - 'अर्जुन ! त्यो सपथ खाइरहेको दीपक मनाङ्गे होइन ?'
अर्जुनले भने - 'गुरुदेव ! म त सम्पूर्ण ओलीतन्त्रमा दीपक मनाङ्गे बाहेक कोहि देखिरहेकै छैन । उहिल्यै देखि !'

— Rabi Mishra (@rabimishra) April 30, 2021

पत्रकार संजीव बगाले भने आफूले दीपक मनाङे भनेर नचिनी उनीसँगको पहिलो भेटको प्रसंग सम्झिएका छन् । 

२०६४ सालमा डिल्ली बजार जेलमा अनशन बसेका कैदी बन्दीको रिपोर्टिङमा जादा भित्र एक जनासँग एउटा विषयमा ठूलै विवाद भएको र त्यो व्यक्ति दीपक मनाङे रहेको कुरा बाहिर आएर साथीले सुनाएकाे उनले भनेका छन् । 

२०६४ सालमा डिल्ली बजार जेलमा अनशन बसेका कैदी बन्दीको रिपोर्टिङमा जादा भित्र एकजनासँग एउटा विषयमा ठुलै विवाद भयो।मसँगै रहेका मेरा सहकर्मीले नबोल्नलाई कोट्ट्याइरहे,तर म रोकिइन।
उनले बाहिर आएपछि मलाई भने- कोसँग बाझेको थाहा छ।
मैले थाहा छैन भने
उनले त्यो दीपक मनाङे हो भने

— सन्जिव बगाले (@sanjib_bagale) April 29, 2021

विमल नामका ट्विटेले मनाङका जनतासँग बसेर  मनाङेले खिचेको तस्वीरसहित सेयर गर्दै जनताको मत जितेर आएकाले उनको सम्मान गर्नुपर्ने बताएका छन् । उनलाई माननीयको भनेर सम्बोधन गर्नुपर्ने उनको भनाइ छ । 'आफ्नो निर्वाचन क्षेत्रका जनताको मन र मत जितेरै आएका हुन्, मतपत्र च्यातेर धाँधली गरेर होइन' उनले भनेका छन्। ​

दीपक मनाङे हैन, माननीय मन्त्री "राजिव गुरुङ" भन्नुस् । तपाईले गुण्डा भन्ने तिनै ब्यक्तिलाई मनाङ्गका जनताले बिश्वास गरेर भोट दिई सांसद बनाईदिएका हुन् । आफ्नो निर्वाचन क्षेत्रका जनताको मन र मत जितेरै आएका हुन्, मतपत्र च्यातेर धाधली गरेर होइन। pic.twitter.com/vR1pdM8RHd

— biMAL❣️🇳🇵❤️ (@kajibimal) April 30, 2021

संविधान र प्रचलित कानुनबमोजिम दीपक मनाङे मन्त्री योग्य भएकैले मन्त्री भएकाले त्यसको विरोध गर्नुको अर्थ नहुने तर्क केहीको छ । तर एक उपसचिवसहित पाँच कर्मचारीको जिम्मामा रहेको प्रदेशको सामाजिक विकास मन्त्रालय अन्तर्गतको युवा तथा खेलकुद महाशाखालाई सनक र लहडका भरमा मन्त्रालय बनाइनुबारे प्रश्न गर्नुपर्ने माग पनि केहीको छ ।

दीपेन्द्र विष्टले दीपक मन्त्री बन्नु मात्रै नभएर उनलाई चुनाव जिताउनु, उनलाई अदालतले उन्मुक्ति दिनु ने गलत भएको तर्क गरेका छन् । ‘जबसम्म हामी आफैँ गुन्डा फटहा चोर डाका हत्यारालाई भोट हालि जिताइ रहन्छौ ती मन्त्री प्रधानमन्त्री भनि रहन्छन् तब रोइलो मच्चाएर के काम ?’ उनले प्रश्न गरेका छन् ।  

दीपक मनाङे मन्त्री बन्नु गलत हो त्यो पहिला दीपक मनाङेलाई भोट हालेर चुनाव जिताउनु गलत हो अनि यो भन्दा पहिला दीपक मनाङेलाइ अदालतले छोड्नु गलत हो र जबसम्म हामी आफै गुन्डा फटहा चोर डाका हत्यारालाइ भोट हालि जिताइ रहन्छौ ती मन्त्री प्रधानमन्त्री भनि रहन्छन तब रोइलो मच्चाएर के काम ??

— दिपेन्द्र बिष्ट (@rock_7up) April 29, 2021

ट्विटरमा कुबेर नामका व्यक्तिले रमाइलो किस्सा बनाएका छन् । कुनैबेला प्रहरीदेखि भागेर हिड्ने मनाङे मन्त्री भएपछि शपथका लागि प्रहरी लिन जाँदा पनि डराएर भागेको भन्ने किस्सा बनाएका छन् । 

‘एकाएक घरमा पुलिसको गाडी आएपछि दीपक मनाङे झ्यालबाट हामफालेर भाग्न थाले । पछि उनलाई यो पाली गिरफ्तारी होइन मन्त्रीको सपथ खुवाउन हो भनी लिएर आए’ 

मिस्टिका नामकी ट्विटेले मन्त्री बनेपछि खादा लगाएर हिँडिरहेका मनाङेलाई सलाम गरिरहेका प्रहरीको तस्बिर सेयर गर्दै हिजो यिनलाई समाउँदै खोरका जाक्दै गर्ने प्रहरीले उनलाई स्यालुट गर्नुपर्दा कस्तो हुँदो हो भनेर प्रश्न गरेकी छिन् । 

हिजो यिनै सुरक्षकर्मीले समातेर खोरमा जाक्दै थिए, आज यिनैले सलुट मार्दै सुरक्षा दिँदैछन् । कठै नी राजनीति ।
कति दुख्दो हो यी प्रहरीहरूलाई ! pic.twitter.com/lAQdOdKwRx

— मिस्टिका🇳🇵 (@mystiDevkota) April 29, 2021

गणतन्त्र नेपालका अन्य नेता भन्दा दीपक मनाङे केहीमा कम नभएकाले उनी मन्त्री हुँदा किन रोइलो भन्दै रविन चाम्लिङले व्यंग्य गरेका छन् । 

‘मुद्दा खेपेका छैनन् की !जेल बसेका छैनन् की ! पैशा कमाएका छैनन्  !
गणतन्त्र नेपालमा अरु नेता भन्दा के मा कम छन मनाङे काम्रेड ? हेप्ने’ उनले भनेका छन् । 
 

मनाङको एउटा गुरुङ्गको छोरा मन्त्री हुँदा किन यस्तो रोइलो !😢
के मा कम छन मनाङे कामरेड ?
👌मुद्दा खेपेका छैनन् की !
👌जेल बसेका छैनन् की !
👍पैशा कमाएका छैनन् !
गणतन्त्र नेपालमा अरु नेता भन्दा के मा कम छन मनाङे काम्रेड ?
हेप्ने !!!!😢

— rabin chamling (@ChamlingRabin) April 30, 2021