सामान्यतया सरकारी कार्यालयमा सेवाग्राहीको भिड लागेको हुन्छ । तर, शुक्रबार नापी कार्यालय कैलालीमा फरक दृश्य देखियो । नापी कार्यालय नै विवाहका लागि झकिझकाउ भएको देख्दा धेरै अचम्मित भए।

कोरोना संक्रमण फैलिएपछि जारी गरिएको निषेधाज्ञाको दोस्रो दिन नापी कार्यालय कैलालीमा एक जोडीको विवाह गरिएको हो। नापीका कार्यालय सहयोगीका अनुसार प्रमुख नापी अधिकृत सुदर्शन सिंह धामीकी बहिनीको विवाह कार्यालयमै आयोजना गरिएको हो। उनले भने, ‘कैलाली प्रशासनको अनुमतिबाट नै विवाह कार्यक्रम आयोजना गरिएको हो ।’

कैलालीका प्रमुख जिल्ला अधिकारी खगेन्द्र रिजालले उक्त विवाहका लागि प्रशासनमा लिखित सूचना नआएको बताउँदै आफूले निषेधाज्ञामा बिहेका लागि कार्यालयमा अनुमति पनि नदिएको बताए।

उनले भने, ‘कार्यालयका हाकिमको आफ्नै घर नभएकाले बहिनीको विवाहका लागि सरकारी कार्यालय प्रयोग गरेको भन्ने सुनेको छु तर, आधिकारिक रूपमा प्रशासनले अनुमति भने दिएको छैन।’