संघीय संसदको सचिवालयमा कार्यरत उपसचिवको कोरोना संक्रमणबाट मृत्यु भएको छ।  प्रतिनिधिसभाको सचिवालयमा कार्यरत उपसचिव कृष्णराज खड्काको मृत्यु भएको संसद सचिवालयले जानकारी दिएको छ । 

शुक्रबार बिहान कलंकीस्थित शहीद मेमोरियल अस्पताल लैजाने क्रममा उनको मृत्यु भएको संसद सचिवालयले जनाएको छ।

बुधबार लिइएको स्वाब परीक्षणका क्रममा उपसचिव खड्कामा कोरोना संक्रमण देखिएको थियो। 

बिहीबार बिहान संक्रमण पुष्टि भएपछि चन्द्रागिरी–१२ स्थित घरमै आइसोलेसनमा बसेका उनलाई शुक्रबार बिहान गाह्रो भएपछि अस्पताल लगिएको थियो।

यसैगरी बिहीबार स्वाब लिइएका मध्ये थप ५ सांसदलाई कोरोना संक्रमण देखिएको संसद सचिवालयले जानकारी दिएको छ । संसद सचिवालयका अनुसार तप १५ कर्मचारी, ४ मर्यादा पालक र संसदीय मामिलामा रिपोर्टिङ गर्ने ४ पत्रकारलाई पनि कोरोना संक्रमण देखिएको छ । 

संघीय संसद भवन नयाँ बानेश्वरमा बुधबार र बिहीबार स्वाब संकलन गरिएको थियो । वैशाख २७ गते संसद बैठक बोलाइएपछि सांसद र सचिवालयका कर्मचारीको पनि कोरोना परीक्षण गरिएको थियो।