पूर्व प्रधानमन्त्री डा. बाबुराम भट्टराईले राष्ट्रपति विद्यादेवी भण्डारीले कोरोनाविरुद्धको खोप माग्दै उत्पादक राष्ट्र प्रमुखलाई पठाएको पत्रप्रति कटाक्ष गरेका छन्। 

एमालेबाट निष्कासित नेता डा. भीम रावलकै शैलीमा डा. भट्टराईले पनि राष्ट्रपतिको कदमको विरोध गरेका हुन्। जनता समाजवादी पार्टीका संघीय परिषद् अध्यक्षसमेत रहेका भट्टराईले प्रधानमन्त्री केपी शर्मा ओली खुरापतमा मस्त रहेको भन्दै कटाक्ष गरेका छन्।

• राष्ट्रपतिले कोरोना खोप माग्दै पत्र लेख्नु पनि गलत र असंवैधानिक : भीम रावल

उनले मंगोलियाको उदाहरण दिँदै चीन र रुस दुवैबाट लिएर उसले सबै नागरिकलाई खोप लगाइसकेको दाबी गरेका छन्। तर भारत र चीन दुवै देशमा खोप उत्पादन हुँदा पनि नेपालले केही गर्न नसकेको उनको आरोप छ।

'कोरोनाविरुद्धको खोप सबैलाई छिटो उपलब्ध गराउनु राज्यको प्रमुख दायित्व हो', उनले भनेका छन्, 'हामी जस्तै ठूला देशको चेपमा परेको मंगोलियाले कुशलतापूर्वक रुस र चीन दुवैबाट लिएर सबैलाई पुर्‍याइसक्दा हामी किन कुइरोको काग जस्तो?'

उनले प्रधानमन्त्री ओलीको नाम नलिइ सरकार प्रमुख खुरापातमा मस्त रहेको आरोप लगाएका छन्। 'सरकार खुराफातमा मस्त हुने अनि सेरेमोनियल राष्ट्रपतिलाई चाहिँ  भीख माग्न लगाउने? खै लाजशरम?', भट्टराईले व्यंग्ययुक्त शब्दसहित भनेका छन्। 

यसअघि एमालेबाट निष्कासित नेता रावलले पनि राष्ट्रपतिले खोप माग्दै उत्पादक राष्ट्र प्रमुखहरुलाई पत्र पठाएर संविधानको ठाडो उलंघन गरेको भन्दै आलोचना गरेका थिए। 

कोरोनाविरूद्धको खोप सबैलाई छिटो उपलब्ध गराउनु राज्यको प्रमुख दायित्व हो।हामीजस्तै ठूला देशको चेपमा परेको मंगोलियाले कुशलतापूर्वक रूस र चीन दुवैबाट लिएर सबैलाई पुर्याइसक्दा हामी किन कुइराको काग जस्तो?सरकार खुराफातमा मस्त हुने सेरेमोनियल रा प लाई चाहिं भीख माग्न लगाउने?खै लाजशरम?

— Baburam Bhattarai (@brb1954) May 31, 2021