संसद विघटनविरुद्धको मुद्दामा बादीतर्फका वकिलहरूले आफूहरुमाथि प्रश्न उठाएपछि सर्वोच्च अदालतका न्यायाधीशद्वय तेजबहादुर केसी र बमकुमार श्रेष्ठले आफ्नो राय दिएका छन्।

न्यायाधीशद्वयले फागुन २३ मा भएको तत्कालीन नेकपा एकता बदरसम्बन्धी फैसला र त्यसको पुनरावलोकनसम्बन्धी मुद्दा छिनोफानो गर्न बस्दैमा संवैधानिक इजलासमा बस्न नमिल्ने वकिलहरूको तर्कलाई अस्वीकार गरिदिएका छन्।

दुवैजनाले आज संवैधानिक इजलासमा पेश गरेको उक्त रायमा नेकपाका अध्यक्ष ऋषि कट्टेलसमेत बादी भएको मुद्दाको विषय नाममा रहेकाले उक्त विषय निरुपण भइसकेको अवस्थामा प्रतिनिधिसभा विघटनसँग त्यसलाई जोडेर गरिने व्याख्यामा सहमत हुन नसकिने तर्क उनीहरुले गरेका छन्।

दुवैजनाले संवैधानिक इजलासमा आफूहरु बस्न नमिल्ने गरी गरिएको तर्कसँग असहमत हुँदै छाड्न नमिल्ने बताएपछि अन्य न्यायाधीशद्वय दीपक कार्की र आनन्दमोहन भट्टराईले संवैधानिक इजलास छाडेका छन्। उनीहरुले यसअघि नै श्रेष्ठ र केसीले संवैधानिक इजलास छाड्नुपर्ने राय राखेका थिए।