प्रधानन्यायाधीश चोलेन्द्र शमशेर जबराले न्यायाधीशद्वय आनन्दमोहन भट्टराई र दीपक कुमार कार्कीलाई संवैधानिक इजलासबाट नहटाइ प्रतिनिधिसभा विघटनविरुद्ध दायर भएको रिटमाथिको सुनुवाइ अघि बढाएका छन्। 

दुई जना न्यायाधीशको विषयलाई लिएर सरकारी वकिलसहितले प्रश्न उठाए पनि उनीहरुलाई नहटाइ आजदेखि बहसले निरन्तरता पाएको हो। बुधबार बिहानबाट सुरु भएको इजलासमा प्रधानन्यायाधीश चोलेन्द्र शमशेर राणाले आइतबार गठन भएकै इजलासलाई निरन्तरता दिने बताए।

प्रधानन्यायाधीश जबराले संसद विघटन र नेपाली कांग्रेसका सभापति शेरबहादुर देउवालाई प्रधानमन्त्री बनाउने विषयमा परेको रिटको सुनुवाइ एकसाथ अघि बढाएका छन्। 

सुनुवाइ अघि बढेपछि न्यायाधीश ईश्वरप्रसाद खतिवडाले संवैधानिक इजलासका न्यायाधीशका विषयमा प्रश्न उठाउन नपाइने चेतावनी नै दिए। 

खतिवडाले अस्तिको कुरा आफूहरुले नोटिस गरिरहेको बताउँदै  आधा घण्टामा बहस सक्न पनि वकिलहरूलाई निर्देशन दिए। ‘अबदेखि यो विषय उठ्नु हुँदैन । हामी चारजना न्यायाधीश एउटै डुंगामा सवार छौँ, हराउने कोसिस कतैबाट नहोस्', उनले भने, 'कहिलेकाहीँ उठान गरिएका कुराहरूको मौनताबाट पनि उत्तर आउँछ। अब थप कुरा नउठाउनुस्। विगतका कुराहरु करेक्सन गर्दै अगाडि जानु पनि पर्ने हुन्छ।'