पाकिस्तानी विदेशमन्त्री शाह महमोद क्युरेसीले कोरोना महामारीसँगको लडाईँमा पाकिस्तान पनि नेपालसँगै रहेको बताएका छन् । पाकिस्तानका लागि नेपाली राजदूत तपस अधिकारसँग भेट गर्दै मन्त्री क्युरेसीले यस्तो बताएका हुन् । 

नेपाली राजदूत अधिकारीले बुधबार विदेशमन्त्री क्युरेसीसँग भेट गरेका थिए । उक्त भेटमा दुई देशबीचको सम्बन्ध र पछिल्लो परिवेशको विषयमा छलफल भएको थियो । 

विदेशमन्त्री क्युरेसीले अहिले नेपालमा कोरोना महामारीले निम्त्याएको अवस्थाका विषयमा आफू जानकार रहेका बताउँदै कोरोनाबाट ज्यान गुमाएका नेपालीहरुमा श्रद्धाञ्जलीसहित परिवारप्रति समवेदना पनि व्यक्त गरेका छन् । 

विदेशमन्त्री क्युरेसी र राजदूत अधिकारीबीच भेटमा दुई देशबीचको सम्बन्धको महत्वको विषयमा पनि कुराकानी भएको पाकिस्तानी विदेश मन्त्रालयले विज्ञप्तिमार्फत जनाएको छ । 

विदेशमन्त्री क्युरेसीले नवनियुक्त नेपाली समकक्षी रघुवीर महासेठलाई पनि राजदूत अधिकारीमार्फत बधाई तथा शुभकामना दिएका छन् । मन्त्री क्युरेसीले कोरोना कालमा पाकिस्तानी नागरिकमाथि नेपालले देखाएको व्यवहारको पनि प्रशंसा गरेका छन् ।