कोरोना महामारीको दोस्रो लहर बढेपछि बन्द बैंक तथा वित्तीय संस्थाका सबै शाखा आजदेखि खुल्ने भएका छन्।

नेपाल राष्ट्र बैंकले बैंक र वित्तीय संस्थाका कार्यालयका लागि लागु गरेको कोटा प्रणाली हटाएपछि मंगलबारदेखि सबै शाखा खोल्न पाइने  भएको हो।

कोरोना महामारीको चेन ब्रेक गर्न गत वैशाख १६ गतेदेखि उपत्यकामा लागू गरिएको निषेधाज्ञाको समयमा राष्ट्र बैंकले वित्तीय क्षेत्रमा तोकेको कोटा प्रणाली हटाएको हो।

यसअघि राष्ट्र बैंकले उपत्यकामा खुल्ने बैंक, विकास बैंक र फाइनान्स कम्पनीको संख्या तोकेको थियो । राष्ट्र बैंकको नियमअनुसार उपत्यकामा वाणिज्य बैंकका अधिकतम् ६ शाखा, विकास बैंकका ४ र फाइनान्स कम्पनीका ३ शाखा मात्रै खुल्ने गरेका थिए। 

राष्ट्र बैंकले यो नियम हटाएपछि अब सम्बन्धित बैंक तथा वित्तीय संस्थाले आफैं निर्णय गरेर शाखाहरूको काम सुचारु गर्न सक्नेछन्।