भिरबाट लडेर घाइते भएकी बाजुरा बुढीनन्दा नगरपालिका-१ बस्ने १६ वर्षीया ललिता गिरीको पाँच दिनपछि उद्धार गरिएको छ । चार दिनदेखि कोल्टी प्राथमिक स्वास्थ्य केन्द्रमा उपचार गराइरहेकी किशोरीको थप उपचारका लागि काठमाडौँ लग्ने तयारी भए पनि प्रतिकूल मौसमका कारणले आइतबार मात्र उद्धार हुन सकेको हो । किशोरीको मनाङ एयरको हेलिकप्टरमार्फत काठमाडौँ लगिएको प्रमुख जिल्ला अधिकारी गोपाल अधिकारीले बताए । 

आन्तरिक मामिला तथा कानुन मन्त्रालय सुदूरपश्चिम प्रदेशले किशोरीलाई उद्धारका लागि हेलिकप्टर पठाएको बताइएको छ । गाउँ नजिकै रहेको रुपासैनी भिरमा घाँस काटिरहेका बेला बुधबार साँझ लडेर ललिता गम्भीर घाइते भएकी हुन्  । उनलाई तत्काल आफन्तले बोकेर कोल्टी प्राथमिक स्वास्थ्य केन्द्रमा पुर्‍याएका थिए ।