प्रदेश-१ सरकारका आन्तरिक मामिला तथा कानुनमन्त्री हिक्मत कार्कीले संघीय सरकारको अवरोधका कारण सुरक्षा निकायलाई आवश्यक पर्ने भौतिक पूर्वाधार र क्षमता विस्तारमा काम गर्न नसकेको बताएका छन् ।

प्रदेश सरकारका प्रवक्ता समेत रहेका मन्त्री कार्कीले विनियोजन विधेयकमाथि भएको छलफलमा जवाफ दिने क्रममा प्रहरीको समायोजनमा ढिलाइ भएकोमा असन्तुष्टी व्यक्त गरे ।

शुक्रबार प्रदेश सभाको बैठकमा मन्त्री कार्कीले प्रहरीको समायोजन नहुँदा प्रहरी र सुरक्षाकर्मीको क्षमता विकास, र भौतिक पूर्वाधार निर्माणमा बजेट विनियोजन गर्न नसकेको बताए । ‘संघीय सरकारले आफू मातहतका क्षेत्रमा मात्रै बजेट विनियोजन गर्न निर्देशन दिएको छ’, उनले भने, ‘त्यसैले हामीले चाहेर पनि प्रहरीका लागि आवश्यक पर्ने भवन र सवारी साधन खरिदमा बजेट छुट्याउन सकेनौँ ।’

प्रदेशको सुरक्षा अवस्था मजबुत बनाउन प्रहरीलाई भौतिक पूर्वाधारले सुसम्पन्न बनाउनु पर्ने हो तर प्रदेशले चाहेर पनि यसमा काम गर्न नसकेको उनको भनाइ छ । ‘अहिले प्रदेशमा प्रहरीका लागि ६० वटा सवारी साधन किनिदिने निवेदन परेको छ । तर हामीले किन्नका लागि क्षेत्राधिकारले दिएको छैन’, उनले भने । 

११ हजार प्रहरी प्रदेश सरकारमा समायोजन भइ प्रहरी गठन भए यस क्षेत्रमा पनि बजेट विनियोजन गर्ने उनले जनाए ।