प्रमुख प्रतिपक्षी दल नेकपा एमालेका वरिष्ठ नेता माधव कुमार नेपाल समूहको बैठक सकिएको छ । नेपाल समूहको बुधबारको बैठकले पार्टी अध्यक्ष केपी शर्मा ओली पक्षका युवाहरुले गरिरहेको एकताविरोधी काम तत्काल रोक्नुपर्ने माग गरेको छ । 

पार्टी एकताका लागि १० बुँदे भइसकेको र वार्ताको वातावरण बनिरहेको अवस्थामा एक नेताविरुद्ध भइरहेको चर्को नाराबाजी तत्काल रोक्नुपर्ने नेपाल समूहको माग छ । एमालेको युवा संघले नेता नेपालविरुद्ध चर्को नाराबाजी गर्दै पुत्लादहन सम्मको प्रदर्शन गरिरहेका छ । 

नेपाल समूहको आजको बैठकले सोही प्रदर्शन रोक्नका लागि पार्टी संस्थापन पक्षसँग माग गरेको हो । यस्ता गतिविधिले पार्टी एकताको वातावरण भाँडिने बैठकको निष्कर्ष छ । 

आजको बैठकमा नेपाल समूहमा रहेका भनिएका उपाध्यक्ष भीम रावल अनुपस्थित रहेका थिए । विश्वासको मत दिने विषयमा नेता नेपालसँग मत बाझिएपछि रावलले सांसद पदबाटै राजीनामा दिएका छन् । रावल नेपाल समूहको बैठकमा पनि अनुपस्थित भएका हुन् ।