प्रमुख प्रतिपक्षी दल नेकपा एमालेले केन्द्रीय कमिटीको बैठक साउन २४ गते बोलाएको छ । आज बसेको स्थायी समिति बैठकले साउन २४ गते केन्द्रीय कमिटी बैठक बोलाएको हो । 

ललितपुरको च्यासलस्थित तुलसीलाल स्मृति भवनमा आज बसेको बैठकले एमालेको विधान अधिवेशन तयारीका लागि साउन २४ गते केन्द्रीय कमिटी बैठक बोलाएको महासचिव ईश्वर पोखरेलले बताएका छन् । 

एमालेले आगामी भदौ २७ र २८ गते विधान महाधिवेशन गर्दैछ । त्यसैको तयारीका लागि केन्द्रीय कमिटी बैठक बस्न लागेको महासचिव पोखरेलले बताए । 

यस्तै, स्थायी समिति बैठकले साउन २७ गतेभित्र पार्टी सदस्यताको नवीकरण र अद्यावधिक गरिसक्ने निर्णय गरेको छ । बैठकले पार्टी सदस्यताको नवीकरण र अद्यावधिक गर्ने समयसीमा साउन २३ गतेसम्मलाई तोकेको पोखरेलले बताए । 

आजको बैठकले सदस्यता नवीकरणको सम्बन्धमा निर्णय गरेको भन्दै महासचिव पोखरेलले स्थायी समिति बैठक भोलि पनि जारी रहने बताए ।