एमालेभित्रको एकताले सार्थक रुप लिन नसकिरहेका बेला सो पार्टीको माधव नेपाल नेपाल समूहले भने सरकारमा जाने तयारी गरेको छ । 

नेपाल पक्षकै निर्णय नआएका कारण प्रधानमन्त्री शेरबहादुर देउवाले सरकार विस्तार गर्न सकेका छैनन् । 

केही दिनयता माओवादी अध्यक्ष पुष्पकमल दाहाल प्रचण्डले नेता नेपाललाई निरन्तर भेट गर्दै आइरहेका छन् । हरेक भेटमा उनले सरकारमा आउन र आगामी दिनमा मिलेर अघि बढ्न आग्रह गरिरहेको बुझिएको छ । 

मंगलबार बिहान पनि प्रचण्डले नेपालसँगको भेटलाई निरन्तरता दिएका थिए । आजको भेटमा नेपालले आफूहरु सरकारमा जान तयार रहेको संकेत गरेको माओवादीनिकट स्रोतले जानकारी दिएको छ ।  

एमालेका दोस्रो तहका नेताहरु एकताको प्रयासमा निरन्तर लागे पनि सो प्रयास निरर्थक बन्दै गइरहेको छ । 

पार्टी अध्यक्ष ओलीले सार्वजनिक रुपमै ‘नेपाललाई अब पार्टीमा कुनै ठाउँ छैन’ भन्दै आइरहेका छन् । ओलीले एकपक्षीय रुपमा विभागहरु पनि गठन गरेर अधिवेशनका कार्यक्रम सार्वजनिक गरेका छन् । 

यी सबै परिदृश्यले एमाले मिलनको भन्दा विछोडको सम्भावनालाई नै मजबुत बनाएको देखिन्छ ।