माध्यमिक शिक्षा परीक्षा (एसइई) मा अंक बढाउनका लागि विद्यार्थीले पैसा नदिँदा जनकपुरधामका एक निजी विद्यालयले मूल्यांकन कमजोर पठाएर विद्यार्थीहरूको भविष्यसँग खेलबाड गरेको आरोप लागेको छ ।

जनकपुरधाम उपमहानगरपालिका वडा नम्बर-९ थापाचोकस्थित युनाइटेड एकेडमी विद्यालयले एसइई परीक्षामा राम्रो मूल्यांकन पठाउनका लागि १५ हजार रुपैयाँ मागेको र  विद्यार्थीहरूले त्यो पैसा नदिँदा करिब २९ जना विद्यार्थीको मूल्यांकन कमजोर पठाइ सबै विद्यार्थीको उच्च शिक्षाको सपनामाथि तुषारापात गरेको आरोप लागेको हो ।

भर्खरै सार्वजनिक भएको एसइईको नतिजामा सो विद्यालयबाट एसइईका लागि फारम भरेका सबै विद्यार्थीको ग्रेड ‘सी प्लस’ आएको र विज्ञान लगायतका विषय पढ्नबाट वञ्चित गरी विद्यालयले भविष्यसँग खेलबाड गरेको विद्यार्थीहरूले आरोप लगाएका छन् । 

विद्यार्थीहरूले सोमबार कमजोर मूल्यांकन गरेको विरोधमा विद्यालय घेराउ गरी मूल गेटमा ताला समेत लगाएका छन् । उनीहरूका अनुसार मूल्याङ्कनभन्दा पहिले विद्यार्थी, विद्यार्थीको अभिभावक र शिक्षकहरूबीच बसेको बैठकमा विद्यालयका प्रिन्सिपल कुशे यादवले विद्यार्थीहरूको मूल्यांकन बढाएर उच्च ग्रेड ल्याउनका लागि प्रति विद्यार्थी १५ हजार रुपैयाँ माग गरेका थिए ।

तर अभिभावकहरूले आफूहरूले विद्यार्थीको विभिन्न शुल्कहरू तिर्दै आएकाले प्रधानाध्यापक यादवले माग गरेको पैसा दिनबाट अस्वीकार गरेका थिए । यता रिजल्ट सार्वजनिक भएपछि सो विद्यालयका २९ जना विद्यार्थीको रिजल्ट कमजोर आएको र यसबाट उच्च शिक्षामा विज्ञान विषय पढ्नबाट वञ्चित भई भविष्य नै अन्धकार भएको भन्दै विद्यालयविरुद्ध अदालत जाने उनीहरूले चेतावनी समेत दिएका छन् ।

सो विद्यालयसँग १० कक्षा पढाउनका लागि अनुमतिसमेत नरहेको बताइएको छ । विद्यालयले धनुषाको कटरैतस्थित सामुदायिक विद्यालयबाट विद्यार्थीसँग परीक्षा दिन लगाएका थियाे । यस सम्बन्धमा विद्यालयका प्रधानाध्यापक कुशे यादवले आफूमाथि लगाइएको आरोप निराधार रहेको बताएका छन् । उनले आफूले कुनै विद्यार्थीसँग एसइईमा अंक बढाउनका लागि पैसा माग नगरेको दाबी गरेका छन्।

यसअघि हिजोमात्रै धनुषाको विदेह नगरपालिका वडा नम्बर-१ ठाढीस्थित मावि ठाढीका प्रधानाध्यापक उमेश पाण्डेले एसइई दिने विद्यार्थीसँग आन्तरिक मूल्यांकनमा अधिक नम्बर दिने प्रतिबद्धता जनाउँदै प्रति विद्यार्थी ६ हजार रुपैयाँ लिएको आरोप लागेको थियो । पछि  रिजल्ट प्रकाशित हुँदा कम ग्रेड आएको भन्दै विद्यार्थीहरूले उनको घर समेत घेराउ गरेका थिए । 

२०७७ सालको एसइई परीक्षाका लागि कोरोनाको कारण देखाउँदै सरकारले आन्तरिक मूल्यांकन गरी नम्बर पठाउन निर्देशन दिएपछि अधिकांश विद्यालयले आर्थिक चलखेल गरी नम्बर दिएको आरोप छ । 

कोरानाको महामारी भन्दै सरकारले भौतिक रूपमा परीक्षार्थीहरूलाई उपस्थित गराउने अवस्था नरहेकोले विद्यालयहरूलाई आन्तरिक मुल्यांकन गरी अंक पठाउन पत्राचार गरेको थियो ।