सत्तारुढ दल नेपाली कांग्रेसमा सभापति तथा प्रधानमन्त्री शेर बहादुर देउवाले १४ औँ महाधिवेशन केन्द्रित भएर आफूनिकटका नेतासँग छलफल सुरु गरेका छन् ।
भाेलि केन्द्रीय समिति बैठक बाेलाएका सभापति देउवाले महाधिवेशनको विषयमा केन्द्रित रहेर आफूनिकट केन्द्रीय नेताहरुसँग छलफल थालेका हुन् । निजी निवास बुढानिलकण्ठमा देउवाले पदाधिकारी तथा केन्द्रीय सदस्यहरुलाई बोलाएर छलफल गरेका हुन् ।
बुधबार बिहानैदेखि देउवाले आफूनिकटका पदाधिकारी तथा केन्द्रीय नेताहरुलाई बोलाएर छलफल सुरु गरेका हुन् । देउवाले महाधिवेशनलाई कति समय सार्न सकिन्छ भन्ने विषयमा छलफलका लागि आफूहरुलाई बोलाएका एक केन्द्रीय सदस्यले बताए ।
छलफलमा सहभागी उनले महाधिवेशनलाई कति समयसम्म सार्न सकिन्छ भन्ने विषयमा सुझाव पनि मागेका बताए । अहिलेको अवस्थामा महाधिवेशनको सम्भावना नभएको भन्दै देउवाले कसरी सार्ने भन्ने विषयमा नेताहरुको राय मागेका थिए ।
वरिष्ट नेता रामचन्द्र पौडेल लगायतका संस्थापन इतरका नेताहरुले भदौ २३ भित्रै कुनैपनि हालतमा महाधिवेशन हुनुपर्ने बताइरहेका बेला देउवा भने महाधिवेशन सार्ने विषयमा केन्द्रित भएर छलफलमा जुटेका छन् ।
देउवाले आफूनिकट नेताहरूसँगको कुराकानीमा आगामी महाधिवेशनका लागि राजनीति कस्तो बनाउने भन्ने विषयमा पनि छलफल थालेका छन् । आजको छलफलमा पनि देउवाले आफ्नो रणनीतिको सम्भावित खाका नेताहरुलाई बुझाएका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।