दार्चुलाका विभिन्न क्षेत्रमा आएको बाढी र पहिरोका कारण तीन जनाको मृत्यु भएको छ भने दुई जना बेपत्ता भएका छन् ।
आइतबार राति आएको बाढीपहिरोमा परी जिल्लाको दुहुँ गाउँपालिका र महाकाली नगरपालिकाका विभिन्न क्षेत्रमा भौतिक तथा मानवीय क्षति भएको छ ।
पहिरोले घर पुरिँदा दुहुँ गाउँपालिका- १ बासपालिकामा नरसिंह महर र उनकी श्रीमती कौशा महरको मृत्यु भएको छ । राति सुतिरहेकै अवस्थामा घरमाथिबाट खसेको पहिरोले उनीहरूकाे पुरिएर मृत्यु भएको जिल्ला प्रहरी प्रमुख डिएसपी मनोहरप्रसाद भट्टले जानकारी दिए ।
यस्तै दुहुँ गाउँपालिकाको वडा नम्बर ५ दुल्लामा बाढीले मनुवा डडालको पनि मृत्यु भएको छ । बाढीले घरजग्गासहित पूल जलविद्युत, पानी घट्ट र पशुचौपायामा समेत क्षति पुर्याएको छ । दुहुँमा पाँचवटा पसल, दुईवटा लघु जलविद्युत् आयोजना, चारवटा झोलुंगे पुल र एउटा पक्की पुल पनि बगेको स्थानीयले बताएका छन् ।
त्यस्तै वडा नम्बर ३ निजाङगाडमा बाढीले दुई जना बेपत्ता छन् । निजाङगाड खोलाको बाढीले स्थानीय शेरसिंह कार्की र हरकसिंह कार्की वेपत्ता भएको स्थानीय दिलिपसिह कार्कीले जानकारी दिए ।
निजाङगाडकै खोलाले दार्चुला-तिंकर सडक मोटरबल पुल, दुइटा झोलुंगे पुल बगाएको छ । यो क्षेत्रमा रहेका आधा दर्जन घर तथा पसलहरू बगाएको छ ।
दार्चुला तिंकर सडक खण्डकाे निजाङगाड पुल बग्दा दुहुँ र व्यास गाउँपालिकाको सम्पर्क टुटेकाे छ । यस्तै महाकाली नगरपालिका- १ को श्रीबगडमा देव बहादुर बम, अमरबहादुर बम, सुन्दर बहादुर बम र जित बहादुर बमको होटल तथा पसल बगाएको छ ।
यस्तै निजाङगाड खोला नजिकै रहेको अपी नाम्पा संरक्षण क्षेत्र कार्यालयको रेन्जपोष्ट भवनको आधा भाग बगाएको छ । अहिले घटनास्थलमा नेपाल प्रहरी, सशस्त्र प्रहरी, नेपाली सेना, रेडक्रस र स्थानीयहरू पुगेका छन् ।
राति २ बजेबाट आएको बाढीले श्रीबगड क्षेत्रकाे खेतबारी नोक्सान गरेको छ । वारिपारि जाने बाटो नहुँदा स्थानीयलाई उद्दारमा समस्या भएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।