प्रमुख प्रतिपक्षी दल नेकपा एमालेको बहिष्कारका बीच बसेको सर्वदलीय बैठक सकिएको छ । बैठकले ठोस निष्कर्ष निकाल्न सकेको छैन । 

प्रतिनिधिसभाको नवौं अधिवेशनमा निरन्तर अवरोध गरिरहेको नेकपा एमालेले सभामुख अग्निप्रसाद सापकोटाले बोलाएको बैठकमा उपस्थिति जनाएन । बैठकबाट निस्किएर सञ्चारकर्मीसँग कुराकानी गर्दै लोकतान्त्रिक समाजवादी पार्टी (लोसपा)का अध्यक्ष महन्थ ठाकुरले ठोस निष्कर्ष नआएको सुनाए । उनले भने, ‘केही निष्कर्ष आएको छैन ।’ 

सभामुखले के भन्नुभयो भन्ने सञ्चारकर्मीको प्रश्नमा ठाकुरले जवाफ दिए- ‘सभामुखले भन्नुभयो-मैले छलफल गरिरहेको छु । सदन खुलाउन अझै पहलकदमी गर्छु ।’

त्यस्तै राष्ट्रिय जनमोर्चाकी उपाध्यक्ष तथा सांसद दुर्गा पौडेलले पनि सदन अवरुद्ध सुचारु गर्नेबारे छलफल भएको बताइन् । उनले भनिन्, ‘आजको बैठकको मुख्य एजेण्डा एउटा मात्रै थियो- सदन अवरोध । यसलाई निष्कर्षमा लैजानका लागि प्रतिपक्षीकाे लिडरहरूले नै नामावली दिएको हुनाले वाद संवादबाट नै हरेक निर्णय हुनुपर्छ ।’