इटालियन सिरी ‘ए’ अन्तर्गत शनिबार राति भएको खेलमा घरेलु टोली इन्टर मिलानले एकतर्फी जित दर्ता गरेको छ । उसले बोलोग्नालाई ६-१ ले पराजित गरेको हो ।
सान सिरोमा मिलानलाई जित दिलाउन इडेन जेकोले २, लाउटारो मार्टिनेज, मिलान स्क्रिनियर, निकोलो बरेला र माथिएस भिसिनोले १–१ गोल गर्दा बोलोग्नाका आर्थर थिएटले १ गोल फर्काए ।
खेलको छैटौँ मिनेटमा मार्टिनेजले गोेल गर्दै मिलानलाई अग्रता दिलाएका थिए । ३० औँ मिनेटमा स्क्रिनियरले टोलीको अग्रता दोब्बर बनाए ।
३४ औँ मिनेटमा बरेलाले गोल गर्दा मिलानले पहिलो हाफमा ३-० को अग्रता बनायो ।
मिलानले दोस्रो हाफमा ३ गोल थप्दा १ गोल खायो । ५४ औँ मिनेटमा भिसिनोले टोलीका लागि चौंथो गोल गरे ।
जेकोले ६३ र ६८ औँ मिनेटमा गोल गर्दै मिलानलाई ६-० को फराकिलो अग्रता दिलाए । ८६ औँ मिनेटमा थिएटले बोलोग्नाका लागि सान्त्वना गोल गरे ।
जितसँगै इन्टर ४ खेलबाट १० अंकका साथ लिगको शीर्ष स्थानमा उक्लिँदा समान खेलबाट ७ अंक जोडेको बोलोग्ना आठौँ स्थानमा छ ।
लिग अन्तर्गत शनिबार नै भएका अन्य खेलमा फियोरेन्टिनाले जिनोआमाथि २-१ र एट्लान्टाले स्पोर्टिभा सलेर्नीटनामाथि १-० को जित दर्ता गरे ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।