कोही खेलाडी कुनै प्रतिद्वन्द्वीका लागि साह्रै दुःख दिने दिने खालका हुन्छन् । दुःख कस्तोभन्दा उसका विरुद्ध लगातार गोल गर्ने ।

लिभरपुलका सादियो माने क्रिस्टल प्यालेसका लागि यस्तै खेलाडी हुन् । शनिबार राति लिभरपुलले प्यालेसलाई इंग्लिस प्रिमियर लिगमा ३-० ले पराजित गर्दा पहिलो गोल यिनै मानेले गरेका थिए ।

यसै क्रममा सेनेगली खेलाडीले लिभरपुलका लागि आफ्नो सयौं गोल पनि पूरा गरे । यो पनि आफैंमा कीर्तिमान हो, तर धेरैले चासो लगाएको कीर्तिमान भने अर्कै छ र यो हो, कुनै प्रतिद्वन्द्वीविरुद्ध उनको लगातार गोल ।

एनफिल्डमा भएको हिजोको खेलसँगै उनले क्रिस्टल प्यालेसविरुद्ध पछिल्ला नौ खेलमा गोल गरेका छन् ।

यस्ता कीर्तिमान विरलै बन्छन् जुन वास्तवमै अनौठो प्रकारका हुन्छन् । मानेले रोबिन भान पर्सीकाे कीर्तिमान तोडेका हुन् । उनले स्टोक सिटीविरुद्ध लगातार आठ खेलमा गोल गरेका थिए । 

मानेले सन् २०१७ मा क्रिस्टल प्यालेस विरुद्ध पहिलो गोल गरेका थिए । त्यसयता उनी यो टोली विरुद्ध गोलविहीन हुनु परेको छैन ।