जनकपुरधाम उपमहानगरपालिकाकी उपप्रमुख रिता कुमारी मिश्रले गणनाको समयमा जो व्यक्ति जहाँ छ, त्यहीँबाट गणना गर्ने प्रक्रियाको विरोध जनाएकी छन्।
उनले समग्रमा मधेसको जनसंख्या कम देखाउन षडयन्त्र भइरहेको आरोप लगाइन् । उनले भनिन्,‘यदि मेरो घरका दुईजना सदस्य जनकपुरमा र दुईजना काठमाण्डौं अथवा विदेशमा बस्छन् भने सबैको तथ्यांक सबै ठाउँबाट संकलन नगरी एकै ठाउँबाट तथ्यांक संकलन गर्नुपर्दछ ।’
‘तराई मधेसमा अधिकांश घरबाट कम्तीमा पनि एकजना व्यक्ति विदेश गएका छन् । कसैको सन्तान अध्ययनका लागि घरबाहिर छन् । यस्तो अवस्थामा यदि जो जहाँ छन् त्यहीँबाट गणना गर्ने हो भने मधेशको जनसंख्या पक्कै पनि कम हुन्छ’,उनले भनिन् ।
भोटरलिस्टको आधारमा जनगणना हुनुपर्ने माग गर्दै उनले भनिन्,‘हामीले एकातर्फ जनसंख्याको आधारमा निर्वाचन क्षेत्र माग गरिरहेका छौं, अर्कोतर्फ हाम्रो जनसंख्या कम गर्ने षडयन्त्र भइरहेको छ । यस्तो अवस्थामा भोलिका दिनमा हामी पक्कै पनि कमजोर हुनेछौं ।’
यसपाली हुन गइरहेको १२ औं जनगणनामा देशभर अनुमानित ७० लाख परिवार, ३ करोडभन्दा बढी जनसंख्याको गणना हुनेछ । यसमा मुख्य ८० वटा प्रश्न रहनेछन् । यस राष्ट्रिय अभियानमा देशका सबै तह, तप्का, निकाय, समुदाय, परिवार, सबैखाले व्यक्तिको सहभागिता जुटाइने छ ।
मुलुकमा बसोबास गरेका सबै व्यक्तिको घरदैलोमा गणकहरू एकै समयमा पुगेर निर्धारित समयभित्र परिवारका सबैको जनसांख्यिक, सामाजिक तथा आर्थिक विवरण संकलन हुनेछन् । संकलित तथ्यांकको प्रशोधन, सारिणीकरण र प्रकाशन गरेपछि जनगणना प्रक्रिया पूरा हुन्छ ।
जनगणनाको मुख्य प्रश्नावली घरमूलीलाई सोधिनेछ । जसमा ५ वर्षमाथिकाको व्यक्तिगत विवरण नाम, थर, जात/जाति, लिंग, जन्मदर्ता, उमेर, पुर्खाको भाषा, मातृभाषा, दोस्रो भाषा, धर्म सोधिनेछ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।