धादिङ जिल्ला साविक लापा, सेर्तुङ्ग, एवं झार्लाङ्ग (हालको रुवीभ्याली गाँउपालिका तथा खनियाबास गाँउपालिका) मा निर्माण हुने धादिङ आँखु खोला हाइड्रोका लागि विभिन्न बैंकहरुसँग सहवित्तीयकरण सम्झौता भएको छ ।
३८ मेगावाट क्षमताको माथिल्लो आँखु खोला जलविद्युत आयोजनामा सिटिजन्स बैँक इन्टरनेसनलको अगुवाईमा नेपाल एसबीआइ बैंक, नेपाल बङ्गलादेश बैंक, मेगा बैंक नेपाल र सिभिल बैँकबाट ऋण लगानी गर्ने गरी सम्झौता भएको जारी विज्ञप्तिमा उल्लेख छ ।
विज्ञप्ति अनुसार सो परियोजनाको अनुमानित लागत करीब ७ अर्ब ३३ करोड रहेको छ । यसमा बैंकहरुको ७५ः२५ को ऋण स्वपुँजी अनुपातमा ५ अर्ब ५० करोड बराबरको ऋण लगानी रहने छ । २५ प्रतिशत स्वपुँजी प्रवद्र्धकहरुबाट जुटाइने जनाएको छ ।
आयोजनाको निर्माण आगामी चार वर्ष भित्रमा सम्पन्न गरी विद्युत उत्पादन गर्ने लक्ष्य छ । जसका लागि नेपाल विद्युत प्राधिकरण, विद्युत विकास विभाग, वन तथा वातावरण मन्त्रालय लगायत सरोकारवाला निकायहरुमा गर्नुपर्ने सबै कानूनी प्रक्रिया पुरा गरी आयोजना निर्माणाधीन अवस्थामा रहेको कम्पनीले जनाएको छ ।
निर्माण सम्पन्न पश्चात उत्पादित बिजुली नेपाल विद्युत प्राधिकरणको नुवाकोट जिल्ला स्थित त्रिशुली ३ बी हव सबस्टेसनमा जोडिने छ । कम्पनीका अनुसार आयोजनाबाट हिउँदमा ६६.७०० गिगावाट घन्टा र वर्षामा १५२.४३८ गिगावाट गरी बार्षिक २१९.१३८ गिगावाट घन्टा खुद विद्युत उत्पादन हुने विज्ञप्तिमा जनाइएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
