पूर्वप्रधानमन्त्री एवं जनता समाजवादी पार्टीका नेता बाबुराम भट्टराईले आगामी वैशाख या जेठमा चुनाव हुने प्रबल सम्भावना रहेकाले जनातासँग नजिकिन आफ्ना कार्यकर्तालाई निर्देशन दिएका छन् । 

बिहीबार पोखरामा आयोजित जसपाको संगठन सुदृढीकरण तथा जनजागरण (सुज) अभियानलाई सम्बोधन गर्दै उनले पाँचदलीय गठबन्धनको सरकार केपी ओलीको असंवैधानिक प्रवृत्तिविरुद्ध भएको बताए । 

आफ्नो पार्टीलाई राजनीतिमा कसैले पनि दयामाया गरेर अगाडि नबढाएको बताउँदै उनले आफ्नै क्षमताले गठबन्धनमा समावेश भएको बताए । जसपा प्रदेश सरकारमा पनि सहभागी भएको र संघमा पनि सहभागी हुने उनले बताए ।  

सरकारले माधवकुमार नेपाललाई सहयोग गर्नकै लागि दलसम्बन्धी अध्यादेश ल्याएको उनले बताए । सोही अध्यादेशका कारण सरकार गठनमा ढिलाइ भएको तर अब छिट्टै सरकार गठन हुने उनले बताए । 

उनले भारत र चीन दुवैसँगको सम्बन्ध कायम राख्दै अमेरिकाजस्तो शक्तिशाली देशसँग पनि सम्बन्ध चिढाउन नहुने बताए । उनले भने, ‘हामीजस्तो गरिब देशले शक्तिशाली ठूला देशसँग नजिस्क्याउने र सन्तुलित सम्बन्ध राखेर सहयोग लिनुपर्छ ।’ 

आगामी वैशाख या जेठमा चुनाव हुने सम्भावना बढी रहेको जनाउँदै उनले आफ्ना कार्यकर्तालाई जनतासँग नजिकिन निर्देशन दिए । ‘हामी वैकल्पिक शक्तिको रुपमा स्थापित भएका छौं’, उनले भने, ‘हाम्रो नीति, विचार राम्रो छ । तर, कार्यान्वयन गर्न सरकारमा नै हुनुपर्छ । संघीयतामा केन्द्रीयमुखी कार्यक्रमभन्दा पनि प्रदेश र स्थानीय तहले वडास्तरसम्मै आफै कार्यक्रम राख्ने र पार्टी संगठित गर्नुपर्छ । आगामी निर्वाचनमा बहुमत ल्याएर सरकारमा सहभागी हुन सकेमात्र हाम्रा योजना कार्यान्वयन हुन्छन् ।’

उनले समानुपातिक सांसद प्रणाली र प्रत्यक्ष निर्वाचित कार्यकारी (राष्ट्रपति) प्रणालीको कार्यान्वयन गर्नुपर्ने बताए । जनताले राष्ट्रपति चुन्ने र राष्ट्रपतिले दुई–चार जना विज्ञ नियुक्त गरेर सरकार गठन गर्नुपर्ने बताउँदै उनले संसदले सरकार गठन गर्न आवश्यक नरहेको बताए ।