ताइवानकी राष्ट्रपति त्साई इङ्ग–वेनले यदि चीनले आफ्नो देशमाथि कब्जा गरे यसको असर एसियाको शान्ति तथा लोकतन्त्रमा पर्ने बताएकी छन् । असर विनाशकारी हुने समेत उनले जनाएकी छन् । 

फरेन अफेयर्स पत्रिकामा प्रकाशित लेखमा राष्ट्रपति त्साईले भनेकी छन्, ‘ताइवान सैन्य टकराव चाहँदैन । तर आफ्नो रक्षाको लागि जे गर्न परे पनि गर्छ ।’ 

उनको यो लेख यस्तो बेला आएको छ जतिबेला चिनियाँ लडाकु विमानहरूले ताइवानको हवाई क्षेत्रको उल्लंघन गरिरहेका छन् । चीनले ताइवानलाई आफ्नो देशको एक हिस्सा मान्दै आएको छ भने ताइवानले आफूलाई स्वतन्त्र देश बताउँदै आएको छ । 

पछिल्लो चार दिनमा लगभग डेढ सय चिनियाँ लडाकु विमानले ताइवानको वायु रक्षा क्षेत्रमा उडान गरेका छन् । यी उडानप्रति ताइवानले आपत्ति जनाइरहेको छ भने चीनले नियमित अभ्यास भएको बताएको छ । 

जापानले विवादलाई कूटनीतिक रुपमा सुल्झाउन चीन र ताइवानलाई अनुरोध गरेको छ । जापानका विदेशमन्त्री तोशिमित्सु मोतेगीले उक्त अनुरोध गरेका हुन् । 

‘दुवै पक्षले यो समस्यालाई सम्वाद मार्फत शान्तिपूर्ण तरिकाले उल्झाउँछन् भन्ने हाम्रो विश्वास छ,’ तोशिमित्सुले भनेका छन् ।