शुक्रबार मन्त्रिपरिषद् विस्तार गरेका प्रधानमन्त्री शेरबहादुर देउवाले क्षमतावान नेताहरूलाई मन्त्री बनाउन नसकिएको बताएका छन् ।

गैरसांसद गजेन्द्र हमाललाई मन्त्री बनाएर विवादित बनेका उनले स्कुल अफ डेमोक्रेसी अमेरिका शाखाले आज आयोजना गरेको पुस्तक विमोचन कार्यक्रममा गठबन्धन सरकार भएकाले क्षमतावान नेताहरू छुटेको बताएका हुन् । 

उनले क्षमतावान नेताहरूलाई मन्त्री बनाउन नसक्दा आफू दुःखित भएको पनि बताए । 

उनले भने, ‘मन्त्रिपरिषदले पूर्णता पाएको छ, हाम्रै पार्टीका योग्य र क्षमतावान साथीहरूलाई न्याय गर्न सकिनँ, म दुःखी छु । गठबन्धन सरकार भएकाेले साथीहरूले बुझ्नुहुन्छ ।’

मन्त्रिपरिषदमा अवसर नपाएका नेताहरूलाई पार्टीमा उपयुक्त जिम्मेवारी दिइने वचन पनि उनले दिए । 

देउवाले निकटस्थ सांसदहरूलाई बढी मन्त्री बनाएकोप्रति पार्टीमा असन्तुष्टि छ ।

संस्थापनइतर पक्षले तीन मन्त्री मागेकोमा देउवाले दुई जनालाई मात्रै मन्त्री बनाए । सोहीकारण संस्थापनइतर पक्ष रुष्ट छ । उनले भने आफूपक्षीय पाँच जनालाई मन्त्री बनाएका छन् ।