सेती नदीमा बाढीको सतह अत्यधिक बढेको छ । योसँगै अछाम र बाजुरा जोड्ने मोटरेबल पुलको प्रयोगमा रोक लगाइएको छ । 

लगातार परेको वर्षाका कारण सेतीको पानीको बहाव खतराको तहभन्दा माथि पुगेको हो । खतराको सतहभन्दा माथि पुगेपछि स्थानीय प्रशासनले पुलबाट आउजाउ रोकेको हो ।

पुलमा आवतजावत बन्द गरिएपछि तराईबाट डोटीको सदरमुकाम सिलगढीलगायत छिमेकी जिल्ला अछाम तथा बाजुरा जानका लागि आएका दर्जनौं सवारी साधन पिपल्ला बजारमा रोकिएका छन् ।

डोटीको गोपघाट र दिपायलस्थित समूहगाढमा रहेको बाढी मापन केन्द्रका अनुसार जलसतह मापनभन्दा अधिक बढेको छ । सेती नदीमा गरिएको पानीको बहाव मापनअनुसार ८.४ क्युसेक पुगेको छ । यो ‘वार्निङ प्वाइन्ट’ भन्दा माथि हो । केन्द्रका अनुसार ३.५ क्युसेक बाढीको बहाव हुँदा नदीमा बाढीको बढी खतरा हुने गर्दछ ।

तीन दिनदेखिको लगातारको वर्षाका कारण नदीमा बहाव बढेपछि जिल्ला प्रशासन कार्यालयले सबै नागरिकलाई सुरक्षित स्थानमा रहन आग्रह गरेको छ ।