इंग्लिस क्लब म्यानचेस्टर युनाइटेडले च्याम्पियन्स लिग अन्तर्गत बुधबार भएको खेलमा इटालियन क्लब एटलान्टालाई पराजित गरेको छ ।

घरेलु मैदान ओल्ड ट्राफोर्डमा पहिलो हाफमै २–० ले पछि परेको युनाइटेडले दोस्रो हाफमा शानदार पुनरागमन गर्दै ३–२ को  रोमान्चक जित दर्ता गरेको हो । 

खेलको १५ औं मिनेटमा मारियो पासलीचले पाहुना टोलीलाई अग्रता दिलाएका थिए । उनले डेविड जापाकोस्टाको पासलाई सदुपयोग गर्दै गरे । 

२९औं मिनेटमा मेरिह डेमिरलले तेउन कोपमिनार्सको कर्नरमा हेडमार्फत गोल गरेपछि युनाइटेड २–०ले पछि परेको थियो ।

५३ औं मिनेटमा मार्कस रासफोर्डले गोल गर्दै युनाइटेडलाई खेलमा फर्काउने संकेत देखाए । उनले ब्रुनो फर्नान्डेजको पासमा गोल गरेका थिए । 

७५औं मिनेटमा ह्यारी म्यागुइरले युनाइटेडलाई २–२ को बरारीमा ल्याए । उनले एडिसन काभानीको पासमा गोल गरेका थिए ।

८१औं मिनेटमा क्रिस्टियानो रोनाल्डोले हेडर गोल गर्दै युनाइटेडलाई अग्रता दिलाए । 
रोनाल्डोले लुक शाको क्रसलाई ६ यार्ड बक्स नजिकबाट पोस्टको दिशा दिएका थिए । त्यसपछि थप गोल हुन नसक्दा युनाइटेडले महत्वपूर्ण जित दर्ता गर्यो ।

यो जितसँगै युनाइटेड ३ खेलमा ६ अंक जोड्दै समूह ‘एफ’को शीर्ष स्थानमा उक्लिएको छ । दोस्रो स्थानको एटलान्टा र तेस्रो स्थानको भिल्लारियलको ४–४ अंक हुँदा पुछारको योङ्ग ब्वाइजको ३ अंक छ । 

यही समूहको अर्को खेलमा भिल्लारियलले योङ्ग ब्वाइजमाथि ४–१ को सहज जित दर्ता गर्यो ।