नेपाल टेलिभिजनबाट नियमित प्रसारण हुँदै आएको कमेडी रियालिटी सो ‘मुन्द्रेको कमेडी क्लब’ सोमबारदेखि बन्द भएको छ । सो रियालिटी सोका कलाकारउमेश राई (फुलन्देकी आमा) अर्को कार्यक्रममा सोही भूमिकामा गएपछि मुन्द्रेको कमेडी क्लब बन्द गरिएको हो । 

कार्यक्रमका सञ्चालक हास्यकलाकार जितु नेपालले सोमबार एक पत्रकार भेटघाट गर्दै सो बन्द गर्ने घोषणा गरेका हुन् । उनले १ सय ३२ भाग प्रसारणसँगै कार्यक्रम बन्द हुने घोषणा गरे । 

आफू आबद्ध कम्पनीले नै अचानक फुलन्देकी आमालाई लिएर अर्को टेलिभिजन सो गर्ने घोषणा गर्दा छक्क परेको नेपालले बताए । उनले भने, ‘फुलन्देकी आमाविना कार्यक्रम गर्नै नसकिने भन्ने होइन । तर, मैले राम्रो गरिरहेको छु । रोइकराई, रातभर नसुती एपिसोड गरिरहेको छु, विज्ञापन आइरहेका छन् । तर, मेरो तारिफ पाउनुको सट्टा टिममै खटपट देखिएपछि मैले ब्रेक लिने सोचेँ ।’

सो रियालिटी सो कि एभरटाइजमेन्ट एजेन्सीले निर्माण गर्दै आएको थियो । एजेन्सीले आफूसँग सल्लाह नगरी कार्यक्रमको कलाकार निकालेर अर्को टेलिभिजनमा कार्यक्रम बनाएपछि कार्यक्रम बन्द गर्नुपरेको र यसबाट आफूलाई दुःख लागेको उनले बताए ।