काठमाडौं– संघीय मामिला तथा सामान्य प्रशासन मन्त्री लालबाबु पण्डितले खटाएको ठाउँमा जान नखोज्ने राष्ट्रसेवक कर्मचारीको प्रवृत्तिले समस्या निम्त्याएको बताएका छन् । कर्मचारीले नेपाल नै नबुझेको उनको गुनासो छ ।
ललितपुरमा नेपाल प्रशासनिक प्रशिक्षण प्रतिष्ठानले आयोजना गरेको ३३औँ आधारभूत प्रशासन प्रशिक्षण सुभारम्भ समारोहको उद्घाटन गर्दै मन्त्री पण्डितले कर्मचारीतन्त्रमा नेपाल भनेको काठमाडौं मात्रै बुझ्ने प्रवृत्ति रहेको बताए ।
‘धेरै राष्ट्रसेवकले नेपाल बुझेनन् । किनभने, नेपाल के बुझे भने काठमाडौं हो, म जहाँ छु त्यही नै नेपाल हो भन्ने बुझे,’ मन्त्री पण्डितले गुनासो पोखे ।
उनले अगाडि भने, ‘प्रदेश नम्बर एकमा केही समयअघि एकजना सचिवलाई पठाइएको थियो । बिहान प्लेनमा जानुभो, हाजिर गर्नुभो र भरे प्लेनमै फर्किनुभो । अनि मलाई आएर भन्नुभो– म तीन घण्टा काम गरेर आएँ, अब सरुवा मिलाइदिनुपर्यो ।’यस्ता राष्ट्रसेवक देख्दा आफूलाई घृणा लाग्ने मन्त्री पण्डितको कथन छ ।
कर्म कता छ, त्यतै जाने मात्र कर्मचारी हुने मन्त्री पण्डितको बझाइ छ । कर्मचारीले काम गर्नभन्दा विदेश घुम्न मात्र खोज्ने गरेको र विदेशमा सिकेको ज्ञान नेपाल आएपछि कमै मात्र प्रयोग गर्ने गरेको उनले बताए ।
सरकारले कर्मचारीको वृत्तिविकास नरोकिने गरी समायोजनको तयारी गरेको भन्दै मन्त्री पण्डितले जानेको र सक्ने काम आफैँ गर्न र नपन्छाउन कर्मचारीहरूलाई आग्रह गरे ।
कर्मचारीहरूले हाजिरसमेत नगर्ने गरेको उल्लेख गर्दै उनले कर्मचारी अभाव स्वयं कर्मचारीले सिर्जना गरेको आरोप लगाए ।
सरकार भौगोलिक विकटतालाई हेरेर कर्मचारी समायोजनको तयारीमा रहेको मन्त्री पण्डितले बताए । तैपनि, मनोवृत्ति बिग्रेका कर्मचारी काठमाडौंजत्तिकै सेवा र सुविधा भएको हेटौँडामा पनि जान नमानेकोमा भने उनी चिन्तित देखिन्थे ।
मनचिन्ते सोचले ग्रसित भएर काम गर्न नसकेका कर्मचारीलाई बिदा गर्न सरकार तयार रहेको पनि मन्त्री पण्डितले उल्लेख गरे । ‘मनचिन्ते सोचले ग्रसित भएर थिचिँदा थिचिँदा काम गर्न नसक्ने भएकालार्इ हात जोडेर बिदा गरिन्छ,’ उनले भने ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
