कञ्चनपुरमा शुक्रबार दिउँसो ट्याक्टर दुर्घटना हुँदा तीन जनाको मृत्यु भएको छ । कञ्चनपुरको पूर्व–पश्चिम राजमार्गअन्तर्गत अर्जुनी ब्यारेक नजिक जन्ती बोकेर फर्किएको ट्याक्टर दुर्घटना भएको हो ।

कञ्चनपुर दैजीबाट कृष्णपुरस्थित घर फर्किरहेको से १ त ३८४१ नम्बरको ट्याक्टर दुर्घटनामा परेको थियो । १४ जना घाइते भएकामा गम्भीर अवस्थाका ३ जनाको मृत्यु भएको हो । 

इलाका प्रहरी कार्यालय झलारीका प्रहरी निरीक्षक कर्ण बोहराका अनुसार कृष्णपुर नगरपालिका– ९ रैकवारका ५५ वर्षीय रनि राना, सोही ठाउँकी ६५ वर्षीया द्रोपती राना र ४४ वर्षीय रतनाकुमारी रानाको मृत्यु भएको हो ।

गम्भीर घाइते भएका चालक रामप्रशाद रानाको प्रादेशिक अस्पतालमा उपचार भइरहेको छ । दैजिमा जन्तीको भोज खाएर कृष्णपुरस्थित घर फर्किंदा दुर्घटना भएको थियो ।