नेपाली कांग्रेसको १४औँ महाधिवेशनअन्तर्गत प्रदेश १ मा ९ पदाधिकारीका लागि २० जनाको उम्मेदवारी परेको छ ।

प्रदेश सभापतिका लागि उद्धव थापा र गुरुराज घिमिरेले उम्मेदवारी दर्ता गराएका छन् । थापा देउवा-सिटौला प्यानलबाट अध्यक्षको प्रत्यासी बनेका हुन् भने घिमिरे शेखर कोइराला प्यानलका उम्मेदवार बनेका हुन् ।

अध्यक्षका प्रत्यासी घिमिरे नेपाल विद्यार्थी संघका पूर्व सभापति हुन् भने थापाले झापा कांग्रेसको २ कार्यकाल नेतृत्व गरिसकेका छन् ।

थापालाई सभापति बनाउन संस्थापन पक्ष सहमत भएपछि कृष्णप्रसाद सिटौला समूहले प्रदेशमा देउवा समूहलाई सघाउने भएको हो ।

चार जना उपसभापति पदका लागि चार जनाको उम्मेदवारी परेको छ । जसमा गोविन्द ढुंगाना, टंक राई, विश्वनाथ रिजाल र रमेशजंग रायमाझी छन् । रायमाझीले यसअघि संस्थापनबाट सभापतिमा उम्मेदवारी दिने चर्चा थियो ।

दुई जना महामन्त्रीका लागि दिपेन श्रेष्ठ, भूपेन्द्र राई, उमेश थापा र पदम सुन्दर पालुङ्गाको उम्मेदवारी दर्ता भएको छ ।

खुल्ला र महिला सहमहामन्त्रीका लागि १० जनाको उम्मेदवारी दर्ता भएको छ । सहमहामन्त्री महिला दुई जना र खुल्ला दुई जना रहने व्यवस्था छ ।

जसमा प्रमिला गच्छदार, मानबहादुर लिम्बू, अन्जना ताम्ली, रोहित साह, सुभचद्र राई, सीता कार्की, वीरकाजी राई, विनोदकुमार बस्नेत, खड्गबहादुर फागो र इन्दिरा थापाले उम्मेदवारी दिएका छन् ।