अस्ट्रेलियाले पनि सन् २०२२ मा हुने बेइजिङ शीतकालीन ओलम्पिकलाई कूटनीतिक रूपमा बहिष्कार गर्ने भएको छ ।
अस्ट्रेलियन प्रधानमन्त्री स्कट मोरिसनले बुधबार सो घोषणा गरेका हुन् । प्रधानमन्त्री मोरिसनले खेलाडी सहभागी भए पनि प्रतिनिधिमन्डल भने स्वदेशमै रहने बताए ।
राजधानी सिड्नीमा आयोजित पत्रकार सम्मेलनमा बोल्दै प्रधानमन्त्री मोरिसनले भने, ‘मानवअधिकार उल्लंघन र सिन्जियाङका मुसलमानमाथिको दुर्व्यवहारलाई लिएर अस्ट्रेलियाले कूटनीतिक रूपमा बेइजिङ ओलम्पिक बहिष्कार गर्नेछ ।’
मानवअधिकार र दुर्व्यवहारमा परेका मुसलमानबारे बारम्बार वार्ता गर्न चाहे पनि चीन सरकारले बेवास्ता गरेको मोरिसनले आरोप समेत लगाए ।
चीनले तिब्बतलाई हेर्ने दृष्टिकोण, त्यहाँ भइरहेका मानवअधिकार दुर्व्यवहारका घटनालाई लिएर अधिकारवादीहरूले महिनौंदेखि बेइजिङ ओलम्पिक बहिष्कार गर्न विभिन्न देशमाथि दबाब दिँदै आएका छन् ।
यसअघि अमेरिकाले पनि बेइजिङमा हुने शीतकालीन ओलिम्पिकलाई कूटनीतिक रूपमा बहिष्कार गर्ने घोषणा गरेको थियो । अमेरिकी खेलाडी भने सो प्रतियोगितामा सहभागी हुनेछन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।