काठमाडौं– निर्मला पन्तका बुबा यज्ञराज पन्तलाई उपचारका लागि काठमाडौं ल्याइएको छ । उनी आज साँझ कञ्चनपुरबाट काठमाडौंको शिक्षण अस्पताल आइपुगेका छन् ।

२५ कात्तिकदेखि धर्नामा बसेका पन्तको स्वास्थ्य अवस्था बिग्रिएपछि उनलाई उपचारका लागि काठमाडौं ल्याइएको हो । पन्त अहिले महाराजगञ्जस्थित शिक्षण अस्पतालको आकास्मिक कक्षमा छन् ।

पन्तलाई हिजै काठमाडौं ल्याउने तयारी गरे पनि खराब स्वास्थ्य अवस्थाका कारण उनलाई प्लेनमा चढ्न दिइएन । प्लेन चढाउन नपाएपछि सुभेच्छुकहरूले पन्तलाई सडकमार्ग हुँदै आज काठमाडौं ल्याएका हुन् ।

पन्तको साथमा उनकी पत्नी दुर्गादेवी पन्त पनि आएकी छिन् । पन्त दम्पती नै २५ कार्तिकदेखि धर्नामा बसेका थिए । पन्त दम्पती उपचारका लागि काठमाडौं आएपछि कञ्चनपुर जिल्ला प्रशासनअगाडिको धर्ना स्थगित भएको छ ।

पन्तको उपचारको खर्च सरकारले दिने वा परिवारले जोहो गर्ने अझै निर्क्योल भएको छैन । अधिकारकर्मीले भने सरकारले नव्यहोरे जनताबाटै उठाएर भए पनि उपचार खर्च जुटाउने बताएका छन् ।

पन्त परिवारलाई सरकारले राहत दिने भने पनि उनीहरूले अहिलेसम्म केही लिएका छैनन् । अपराधी पत्ता नलगाएसम्म राहत नलिने उनीहरूको अडान छ । 

यज्ञराजको उपचार खर्च कसले व्यहोर्ने भन्नेमा भने सरकारले केही बोलेको छैन ।