प्रधानमन्त्री शेरबहादुर देउवाले गठबन्धनको सरकार पूरा समयसम्म चल्ने दाबी गरेका छन् ।

आइतबार नेकपा (माओवादी केन्द्र) को ८ औँ महाधिवेशनमा बोल्दै उनले गठबन्धन कसैको विरुद्धमा नबनाइएको भन्दै संसद र संविधान बचाउने भनेकै गठबन्धन भएको बताए । प्रधानमन्त्री देउवाले आफूले निर्वाचनभन्दा अघिसम्म पनि गठबन्धन जानुपर्नेमा जोड दिए ।

‘अहिलेको बेलामा जो हाम्रो गठबन्धन बनेको छ, यो कसैको विरुद्धमा होइन, तर के छ भने अहिलेको संविधानबाट जो, संसद पूरा चलोस्, बीचमा संसद भंग नहोस्, मनपरी भंग नहोस्, भनेर संविधान बनाइएको जस्तो लाग्छ । म पनि संविधानसभाको सदस्य थिएँ । यो संविधानको आधारमा फेरि हामीले अदालतमा गएर बनाएको गठबन्धन छ, यो कसैको खिलाफको गठबन्धन होइन । संविधानका साथै संसद बचाउने गठबन्धन हो' उनले भने ।

उनले गठबन्धन बीचै तोडिन्छ भनेर कसैलाई शंका नगर्न आग्रह गरे । 'म त अझ अगाडि पनि गठबन्धन जाओस् भन्ने चाहन्छु, ओलीजीलाई नलागोस् कि हाम्रो खिलाफमा गठबन्धन गरे, आफूले त मिल्न पाइन्छ नि’ उनले भने ।

प्रधानमन्त्री देउवाले नेकपा (माओवादी केन्द्र) का अध्यक्ष पुष्पकमल दाहाल प्रचण्डको अगुवाइमा संविधानसभाको चुनाव भएको स्मरण गरे ।