सन् २०२२ मा हुने खेलकुदका मुख्य प्रतियोगिता
फरकधार / १८ पुस, २०७८

सन् २०२२ विश्व खेलकुदका लागि केही विशेष हुने छ किनकि यो वर्ष विश्व खेलकुदका केही मुख्य प्रतियोगिता आयोजना हुनेछन् ।



तीमध्ये चीनमा हुने शीतकालीन ओलम्पिक र कतारमा आयोजना हुने फिफा पुरुष विश्वकपलाई विशेष महत्त्वका साथ हेरिएको छ ।

सन् २०२२ मा आयोजना हुने खेलकुदका मुख्य प्रतियोगिता

फुटबल



सन् २०२२ मा विश्व फुटबल निकै व्यस्त हुनेछ । यो विभिन्न देशका घरेलु लिग, महदेशीय प्रतियोगिता, युईएफए च्याम्पियन्स लिग, युरोपा लिग जस्ता प्रतियोगिता आयोजना हुनेछन् ।

यो वर्ष सबैभन्दा केन्द्रमा रहने फुटबल प्रतियोगिता युएइफए महिला युरो कप र फिफा पुरुष विश्वकप नै हुन् ।

महिला युरो कप ६ देखि ३१ जुलाइसम्म इंग्ल्यान्ड तथा फिफा पुरुष विश्वकप २१ नोभेम्बर  देखि १८ डिसेम्बरसम्म कतारमा हुनेछ ।

यसपल्टको विश्वकप धेरै अर्थमा फरक र विशेष हुनेछ । किनकि सन् १९३० देखि सुरु भएको प्रतियोगिता पहिलोपटक नोभेम्बर–डिसेम्बरमा आयोजना हुँदैछ । यसको प्रमुख कारण हो कतारको प्रचण्ड गर्मी ।

क्रिकेट

क्रिकेटमा पनि यो वर्ष विभिन्न घरेलु प्रतियोगिता र अन्तर्राष्ट्रिय सिरिजहरू हुनेछन् तर महत्त्वपूर्ण प्रतियोगिता भने महिला एक दिवसीय तथा पुरुष टि–२० विश्वकप हुन् ।

४ मार्चदेखि ३ अप्रिलसम्म न्यूजिल्यान्डले महिला एकदिवसीय विश्वकप आयोजना गर्दैछ । पुरुष टि–२० विश्वकप १६ अक्टोबरदेखि १३ नोभेम्बरसम्म अस्ट्रेलियामा हुनेछ ।

टेनिस

यो वर्ष टेनिसका चारै ग्राण्डस्लाम प्रतियोगिता आयोजना हुनेछन् ।

१७ देखि ३० जनवरीसम्म पहिलो ग्राण्डस्लामका रूपमा अस्ट्रेलियन ओपन मेलबर्नमा आयोजना हुनेछ ।

पेरिसमा २२ मे देखि ५ जुनसम्म फ्रेन्च ओपन र २७ जुनदेखि १० जुलाइसम्म लन्डनमा टेनिसको सबैभन्दा ठूलो प्रतियोगिता विम्बेल्डन आयोजना हुनेछ ।

वर्षको अन्तिम ग्राण्डस्लामका रूपमा २९ अगस्ट देखि ११ सेप्टेम्बरसम्म न्यु योर्कमा युएस ओपन आयोजना हुनेछ ।

यीबाहेक पनि यो वर्ष टेनिसका विभिन्न प्रतियोगिता हुनेछन् ।

बहुखेल समावेश हुने खेलकुदका प्रतियोगिता

शीतकालीन ओलम्पिक

शीतकालिन ओलम्पिक ४ देखि २० फेब्रुअरीसम्म चिनको बेइजिङमा हुनेछ । त्यस्तै चीनले ४ देखि १३ मार्चसम्म शीतकालीन पाराल्याम्पिक पनि आयोजना गर्नेछ ।

२८ जुलाइदेखि ८ अगस्टसम्म कमनवेल्थ गेम्स इंग्ल्यान्डको बर्मिङघममा आयोजना हुँदा ११देखि २१ सम्म जर्मनीको म्युनिखमा युरोपियन स्पोटर्स च्याम्पियनसिप हुनेछ ।

१० देखि २५ सेप्टेम्बरसम्म चीनमा एसियन गेम्स हुँदा १ देखि १५ ओक्टोबरसम्म पाराग्वेले दक्षिण अमेरिकी गेम्सको आयोजना गर्नेछ ।

यीबाहेक यो वर्ष भलिबल, पौडी, फर्मुला वान, गल्फ, रग्वी, साइक्लिङ,एथलेटिक्सजस्ता खेलको पनि विभिन्न प्रतियोगिता आयोजना हुनेछन् ।

  • प्रकाशित मिति : पुस १८, २०७८ आइतबार १५:५५:५,   अन्तिम अपडेट : पुस १८, २०७८ आइतबार १६:२१:४६

फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, टिकटक, युट्युबमा पनि जोडिन सक्नुहुन्छ ।


यस विषयसँग सम्बन्धित समाचार

यो सामग्री सेयर गर्नुहोस्


यो पनि नछुटाउनुहोस्
मल्टिमिडिया