एमाले कैलाली नेतृत्वको लागि मतदान सुरु भएको छ । सोमबार बिहानबाट मतदान सुरु भएको हो । अध्यक्षलगायत पदाधिकारीमा असहमति भएपछि निर्वाचनमा गएकाे हाे ।

धनगढीस्थित ऋद्धिसिद्धी पार्टी प्यालेसमा मतदान सुरु भएको निर्वाचन समितिले जनाएको छ । मतदान दिउँसो १ बजेसम्म चल्ने समितिले जनाएको छ ।

अध्यक्षमा वर्तमान अध्यक्ष रतन थापा र उपाध्यक्ष रणबहादुर चन्द प्यानलसहितको उम्मेदवारी छ । उपाध्यक्षमा दुर्गा जोशी र सीताराम बुढाथोकीको उम्मेदवारी परेको छ।

सचिवमा दानबहादुर बिक र डेजी पाण्डेको उम्मेदवारी छ । उपसचिवमा मदन ओझा, प्रेम चौधरी, ममता चौधरी, लोकेन्द्र साही र विनय शाहले उम्मेदवारी दिएका छन्।

कैलालीमा ६०६ जना प्रतिनिधिले मतदान गर्नेछन् ।

यसअघि आइतबार बिहान ८ बजेका लागि तोकिएको मतदान निर्वाचन समितिले प्राविधिक कारणले भन्दै दिउँसोसम्म सारेको थियो ।

तर साँझसम्म मतदान प्रक्रिया सुरु हुन सकेको थिएन । मतदानमा ढिलाइ भएको भन्दै प्रतिनिधिहरू आक्रोशित भएपछि अधिवेशन स्थलमा तनाव सिर्जना भएको थियो ।

दुई पक्षबीचको विवादका कारण निर्वाचन समितिले सोमबारसम्मका लागि निर्वाचन प्रक्रिया स्थगित गरेको थियो ।