राष्ट्रियसभा निर्वाचनमा फ्लोर क्रस गर्ने जनप्रतिनिधिलाई नेकपा एमालेले कारबाही गर्ने भएको छ । नेकपा एमाले प्रदेश १ कार्यालयले बिहीबार विज्ञप्ति जारी गर्दै राष्ट्रियसभा निर्वाचनमा पार्टीका उम्मेदवारलाई मत नदिने जनप्रतिनिधिलाई कारबाही गर्ने जनाएको हो ।

नेकपा एमाले प्रदेश राष्ट्रियसभा चुनावमा पार्टीभित्रका कतिपय अवसरवादी र अराजक पात्रहरूले अवाञ्छित हर्कत गरेको ठहर गर्दै कारबाही गर्ने जनाएको हो । नेकपा एमाले प्रदेश १ संयोजक तुलसी न्यौपानेले विज्ञप्ति जारी गर्दै अन्तर्घाती कदमको वस्तुनिष्ठ छानबिन गरी कारबाही गर्ने चेतावनी दिएका हुन् । 

'राष्ट्र, जनता, पार्टी, क्रान्तिका वैरीहरूले हाम्रो पार्टीविरुद्धमा चालेका षडयन्त्रको शिकार भएर पार्टीभित्रका कतिपय अवसरवादी र अराजक पात्रहरूले यो राष्ट्रिय सभा सदस्य पदको निर्वाचनमा समेत अवाञ्छित हर्कत गरेको पाइएको छ' विज्ञप्तिमा भनिएको छ, ‘पार्टी निर्णय र हितविरुद्धमा चालिएका अन्तर्घाती कदमको वस्तुनिष्ठ छानबिन गरी दोषी उपर कडा कारबाही गर्न हाम्रो पार्टी नेकपा एमाले दृढ संकल्पित छ ।’