नेकपा माओवादी केन्द्र आजै सरकारबाट बाहिरिन सक्ने सम्भावना बढेको छ । सत्तारुढ गठबन्धनमा पछिल्लो समय अमेरिकी सहयोग परियोजना एमसिसीबारे मतभेद हुँदा यो अवस्था आउने सम्भावना बढेको हो ।

एमसिसी संसदमा टेबुल भएमा के गर्ने भन्ने विषयमा छलफल गर्न बसेको माओवादी केन्द्रको संसदीय दलको बैठकले एमसिसी अहिलेको अवस्थामा पारित हुन नहुने निष्कर्ष निकालेको छ । 

‘राष्ट्रिय सहमति भएन भने एमसिसी यही अवस्थामा अगाडि बढ्दैन,’ माओवादी केन्द्रका प्रमुख सचेतक देव गुरुङले बैठकपछि भनेका छन्, ‘सरकारको धारणा भनेको पाँच दलको धारणा हो । यो एउटा पार्टीबाट मात्र आउन सक्दैन ।’

उनले कुनै एउटा पार्टीले मात्र एमसिसी अगाडि बढाउन खोजेको खण्डमा माओवादी केन्द्र सरकारबाट बाहिरिने संकेत पनि गरेका छन् ।

‘सरकारले जबरजस्ती गरेको खण्डमा हामी सरकारमा रहिरहँदैनौँ,’ उनले भने, ‘सरकारको निर्णय भनेको पाँच दलको निर्णय हो, तर यो निर्णयविना अगाडि बढियो भने माओवादी केन्द्र सरकारमा रहिरहँदैन, गठबन्धन तोडियो भन्ने कुरा हो ।’