भारतीय सर्वोच्च अदालतले ‘गंगुबाई काठियावाडी’का निर्मातालाई फिल्मको नाम फेर्न निर्देशन दिएको छ । यो फिल्म शुक्रबारबाट रिलिज हुँदैछ ।
न्यायाधीशद्वय इन्दिरा बनर्जी र जेके महेश्वरीको डिभिजन बेन्चले सञ्जय लीला भन्सालीका वकिल सिद्धार्थ दवेलाई अदालतको निर्देशन निर्मातालाई जानकारी गराउन भनेको बिबिसी हिन्दीले उल्लेख गरेको छ ।
आफूलाई गंगुबाई काठियावाडीका धर्मपुत्र भन्ने बाबुजी रावजी शाहले यस सम्बन्धमा सर्वोच्च अदालतमा निवेदन दिएका थिए ।
बाबुजी रावजी शाह यसअघि मुम्बई उच्च अदालत पुगेका थिए तर त्यहाँ उनको याचिका खारेज भएको थियो । त्यसपछि उनले सर्वोच्च अदालतको ढोका ढक्ढकाएका थिए ।
यस फिल्मको नामबाहेक बाबुजी रावजी शाहले अन्य धेरै कुरामा पनि आपत्ति जनाउँदै फिल्मको प्रदर्शन रोक्न माग गरेका छन् । सर्वोच्च अदालतले बिहीबार यस विषयमा सुनुवाइ गर्नेछ ।
भन्साली प्रोडक्सनमा बनेको यो फिल्ममा आलिया भट्टले मुख्य भूमिका निभाएकी छिन् । यस फिल्मका निर्देशक सञ्जय लीला भन्साली हुन् ।
फिल्म १९६० को दशकमा मुम्बईको कामाठीपुरामा वेश्यालय चलाउने गंगुबाईको जीवनबाट प्रेरित छ । यो फिल्म माफिया क्विन अफ मुम्बई नामको किताबमा आधारित छ, जसलाई एस. हुसेन जैदी र जेन बोर्जेसले लेखेका थिए ।
गंगुबाईको वास्तविक नाम गंगा हरजीवनदास काठियावाडी थियो । उनी गुजरातको काठियावाडमा जन्मिएकी थिइन् र त्यहीँ हुर्किएकी थिइन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।