आइतबारको प्रतिनिधि सभाको दोस्रो बैठकमा एमसिसी सम्झौता पारित हुने भएको छ । लामो समयसम्म एमसिसीको विरोधमा रहेका दुई सत्तारुढ पार्टीले एमसिसी पारित गर्ने सहमति गरेसँगै आज संसदबाट पारित हुने भएको हो ।  

आज हुने मतदानमा सत्तारुढ माओवादी केन्द्रका दुई सांसदले भने भाग नलिने भएका छन्। सांसदहरू गिरिराजमणि पोखरेल र अन्जना विशंखेले मतदान भाग नलिने भएका हुन् । 

माओवादी केन्द्रको आजै बसेको संसदीय दलको बैठकले एमसिसी व्याख्यात्मक टिप्पणीसहित  पारित गर्ने निर्णय गरेको थियो। सो निर्णय आएसँगै उनीहरूले यसबारे पार्टी अध्यक्ष पुष्पकमल दाहाल ‘प्रचण्ड’ लाई जानकारी दिइसकेका छन्।

पार्टीले निर्णय गरे पनि एमसिसीको छलफलमा सहभागी माओवादी सांसदहरूले एमसिसी सम्झौताको विरोध गरेका छन्।