प्रसिद्ध साहित्यकार कालीप्रसाद रिजाललाई ‘वानिरा प्रज्ञा पुरस्कार’ प्रदान गरिने भएको छ । साहित्यकार डा.वानीरा गिरीको स्मृतिमा स्थापित उक्त पुरस्कारको राशि एक लाख छ । 

यसैगरी, नेपाली भाषा र साहित्यमा समर्पित कवयत्री श्रीमती उषा शेरचनलाई पचास हजारसहितको ‘वानिरा पुरस्कार’ प्रदान गरिने भएको छ ।

डा.वानीरा गिरीको ७९औँ जन्मजयन्तीका अवसरमा आगामी वैशाख २० गते काठमाडौंमा वानिरा फाउन्डेसन भवनको उद्घाटनका क्रममा ती पुरस्कार प्रदान गरिने फाउन्डेसनले जनाएको छ । 

फाउन्डेसनका संस्थापक तथा संरक्षक शंकर गिरीको उपस्थितिमा अध्यक्ष श्रीमती इन्दिरा प्रसाईंको अध्यक्षतामा बसेको बैठकले उक्त निर्णय गरेको हो ।