नेपाली कांग्रेसकी केन्द्रीय सदस्य सुजाता कोइरालाले पार्टीको १४औँ महाधिवेशनमा आफ्नै दाजु शेखर कोइरालालाई समर्थन नगरेर सभापति शेरबहादुर देउवालाई समर्थन गर्नु आफ्नो सिद्धान्त भएको बताएकी छिन् । 

‘मैले शेखर दालाई समर्थन गरेको भए पनि उहाँले जित्ने स्थिति थिएन,’ कोइरालाले बुधबार विराटनगरस्थित आफ्नो निवासमा सञ्चारकर्मीसँग भनिन्, ‘म शेखर दालाई नेता मान्छु । तर, मैले महाधिवेशनमा उनलाई समर्थन गर्नुपर्ने औचित्य ठानिनँ । यसबारे म थप केही बोल्दिनँ र बोल्न जरुरी पनि ठान्दिनँ ।’

पूर्वउपप्रधानमनत्री कोइरालाले आगामी स्थानीय निर्वाचनमा सत्तारुढ दलहरुबीच गठबन्धन आवश्यक रहेको बताइन् । केपी ओली नेतृत्वको सरकार हटाउन गठबन्धन नै आवश्यक परेकाले अझै पनि मुलुक र प्रजातन्त्रका लागि गठबन्धन अपरिहार्य भएको उनले बताइन् । 

आगामी संघीय निर्वाचनमा मोरङ क्षेत्र नं २ बाट उम्मेदवारी दिने पनि कोइरालाले घोषणा गरिन् । अघिल्लो निर्वाचनमा आफू अस्वस्थ भएकाले उम्मेदवार बन्न नसकेको, तर अब उममेदवार बन्ने उनले बताइन् । 

सो क्षेत्रबाट गिरिजाप्रसाद कोइरालाले तीनपटक संसदीय निर्वाचन जितेका थिए । पछिल्लोपटक सो क्षेत्रबाट निर्वाचन जितेरमीनेन्द्र रिजाल संघीय सांसद बनेका छन् । सुजाताले सो क्षेत्र आफ्नो भएकाले आगामी निर्वाचनमा कांग्रेसको उम्मेदवार आफैँ हुने दाबी गरिन् ।