सुदूरपश्चिममा आसन्न स्थानीय तह निर्वाचनको तयारी तीव्र पारिएको छ । प्रदेश निर्वाचन कार्यालय र जिल्ला निर्वाचन कार्यालयले ३० वैशाखमा हुन लागेको स्थानीय निर्वाचनको तयारी तीव्र पारेका हुन् ।
प्रदेशका ८८ स्थानीय तहमा निर्वाचन अधिकृतको कार्यालय स्थापना गर्ने तयारी थालिएको छ । सुदूरपश्चिममा १ हजार १३५ मतदानस्थलमा २ हजार १०३ मतदान केन्द्रबाट मतदान हुने व्यवस्था मिलाउने तयारी भइरहेको प्रदेश निर्वाचन कार्यालयका निमित्त प्रमुख प्रेमराज भट्टले बताए ।
‘३० गते हुने निर्वाचनका लागि प्रदेशका सबै निर्वाचन कार्यालयले बिहीबार सबै पालिकामा निर्वाचन अधिकृतको कार्यालय स्थापना गर्दैछौँ’, उनले भने, ‘अहिले निर्वाचनका लागि आवश्यक सामग्री मतदान केन्द्रमा पुर्याउने काम भइरहेको छ ।’ मतदानस्थलको अनुगमनसमेत गरिएको उनले जानकारी दिए ।
प्रदेशमा रहेका ८८ स्थानीय तहका प्रमुख र उपप्रमुखसहित ७३४ वडाध्यक्ष र २ हजार ९३६ वडा सदस्यका लागि हुने निर्वाचनबाट कुल ३ हजार ८४६ जना जनप्रतिनिधि निर्वाचित हुनेछन् ।
सुदूरपश्चिममा कैलाली र कञ्चनपुरमा सबैभन्दा बढी मतदाता र मतदान केन्द्र रहेका छन् । जिल्ला प्रशासन कार्यालय कैलालीले जिल्लाभरका ५२ वटा मतदानस्थललाई सुरक्षाका दृष्टिकोणले अति संवेदनशील मतदान स्थलको सूचीमा राखेको छ ।
कैलालीमा ५२ वटा मतदानस्थल अति संवेदनशील, संवेदनशील १ सय ३१ वटा र सामान्य ५३ वटा मतदान स्थलहरू निर्धारण गरिएको सहायक प्रमुख जिल्ला अधिकारी यज्ञराज जोशीले जानकारी दिए ।
उनका अनुसार संवेदनशील निर्वाचन केन्द्रमा तीन म्यादीसहित आठदेखि नौ जना प्रहरी, अति संवेदनशील ठाउँमा पाँचजना प्रहरीसहितको टोली र सामान्यमा दुई प्रहरी र चारजना म्यादी प्रहरीको टोली रहनेछ । त्यस्तै, सशस्त्र प्रहरीको हकमा डिएसपीको कमाण्डमा तीनवटा मोबाइल टोलीअन्तर्गत २७ जना रहनेछन् । प्रत्येक नगरपालिकामा पाँचदेखि तीन जनासम्मको स्टकिङ्ग फोर्स राखिएको जोशीले बताए ।
कैलालीमा २ लाख ५६ हजार १ सय ४ जना पुरुष, २ लाख ६९ हजार १० जना महिला र ११ जना अन्य गरी कुल ५ लाख २५ हजार १२५ जना मतदाता रहेका छन् । जसमा ६४ हजार ५ सय ४७ जना नयाँ मतदाता रहेका छन् ।
कञ्चनपुरमा पनि निर्वाचनको तयारी तीव्र भइरहेको जिल्ला निर्वाचन कार्यालयका सूचना अधिकारी भानबहादुर महराले जानकारी दिए । ‘कञ्चनपुरमा पनि बिहीबार निर्वाचन अधिकृतको कार्यालय स्थापना गर्ने कार्यक्रम छ,’ उनले भने, ‘निर्वाचन सामग्री चार पालिकामा पुगाउने काम भएको छ भने बाँकीमा आजसम्म पुगाउँछौँ ।’
निर्वाचन आयोगको कार्यतालिकाअनुसार बाजुराको पनि सबै पालिकाको केन्द्रमा बिहीबार नै मतदान अधिकृतको कार्यालय स्थापना गर्ने तयारी छ । कार्यालय स्थापना भएसँगै निर्वाचन सामग्री र सुरक्षाकर्मीसमेत खटिने जिल्ला निर्वाचन कार्यालयका प्रमुख नवराज अवस्थीले बताए ।
‘बाजुराका ९ स्थानीय तहका निर्वाचन केन्द्रको अनुगमन सम्पन्न भएको छ,’ उनले भने, ‘हामीले निर्वाचन सामग्री खरिद गरिसकेर मतदान केन्द्रमा पुगाउँदै छौँ ।’ यसपाली सुदूरपश्चिममा ११ सय ३५ मतदान स्थल र २ हजार १ सय ३ वटा मतदान केन्द्र तोकिएका छन् । त्यस्तै, प्रदेशभरिमा ८ लाख ८० हजार ६ सय ८२ पुरुष तथा ८ लाख ३१ हजार ४ सय ७० जना महिला र १८ अन्य गरी कुल १६ लाख ३२ हजार १५२ मतदाता रहेका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।