सत्तारुढ गठबन्धनको बिहीबार भरतपुरमा भएको चुनावी आमसभामा भाषण गर्न पुगेका सन्दीप क्षेत्री अहिले निकै विवादमा तानिएका छन् । त्यहाँ उनले सत्तारुढ गठबन्धनकी उम्मेदवार रेनु दाहालको पक्षमा वकालत गरेका थिए, मत मागेका थिए । 

तर, उनको यो सम्बोधनपछि उनको विषयमा सामाजिक सन्जालमा व्यापक विरोध देखिएको छ । 

कलाकार भएर तटस्थ नबसेको भन्दै उनको विरोध हुन थालेको हो । कतिसम्म भने सामाजिक सन्जाल प्रयोगकर्ताले कलाकार भएर एउटा व्यक्तिको पक्षमा खुलेकाले उनका कार्यक्रमलाई बहिस्कार गर्नेसमेत बताएका छन् ।

सन्दीपले भरतपुरमा गरेको सम्बोधनपछि उनको सामाजिक सन्जालमा उनलाई नकारात्मक प्रतिक्रिया दिनेहरुको पनि संख्या निकै बढेको छ ।

तर, यस विषयमा उनले कुनै औपचारिक विज्ञप्ति निकालेका छैनन् । सत्तारुढ गठबन्धनको सभामा चाहिँ उनले रेनुलाई दिदी भन्दै आफ्नो धारणा राखेका थिए ।